Ashyq qosymshasy adamdardyń ómirin «baqylaýǵa» arnalmaǵan – Alekseı Tsoı

NUR-SULTAN. QazAqparat – «Ashyq» qosymshasy 13 myńnan astam bıznes sýbektisiniń qyzmetin qaıta qalpyna keltirýge kómektesedi. Bul týraly búgin Densaýlyq saqtaý mınıstri Alekseı Tsoı aıtyp berdi, dep habarlaıdy QazAqparat tilshisi.

«Koronavırýs pandemııasy bastalǵannan beri búkil álemdegi bıznestiń jumysyna shekteý qoıyldy, kásipkerlerge tabys kirmeı qaldy. Bul bizdiń elge de qatysty. 13 myńnan astam bıznes sýbektisi áli kúnge deıin qyzmetin qaıta bastaı almaı otyr. «Atameken» UKP-nyń qatysýymen bıznes qaýymdastyq Ońtústik-Shyǵys Azııa elderiniń (Gonkong, Sıngapýr, Malaızııa) tájirıbesin eskere otyryp, «ASHYQ» jobasyn iske asyrýdy usyndy», - dedi mınıstr QR Prezıdenti janyndaǵy Ortalyq kommýnıkatsııalar qyzmetinde ótken brıfıngide.

«Ashyq» mobıldi qosymshasyn «Atameken» UKP, QR Tsıfrlyq damý, ınnovatsııalar jáne aeroǵarysh ónerkásibi mınıstrligi jáne QR Densaýlyq saqtaý mınıstrliginiń tapsyrysy boıynsha otandyq IT-kompanııa ázirlegen.

«Búginde pılottyq rejımde «ASHYQ» qosymshasy Almaty, Nur-Sultan jáne Qaraǵandy qalalarynda qyzmet kórsetýge ruqsat etilgen nysandarda (fıtnes-ortalyq, spa-ortalyq, basseın, monsha, kınoteatrlar) iske qosyldy. Qazir 40 nysan «Ashyq» pılotyna erikti túrde qatysýda», - deıdi A.Tsoı.

«Ashyq» mobıldi qosymshasy QR-kod arqyly jáne Densaýlyq saqtaý mınıstrliginiń ortaq bazasymen ıntegratsııalaý arqyly kelýshiniń mártebesin, onyń vırýs tasymaldaýshysy emes ekenin anyqtaýǵa múmkindik beredi. Sondaı-aq nysandardyń kelýshilerdi qabyldaýǵa ázirligin jáne olardyń sanıtarlyq talaptarǵa sáıkestigin kórsetedi.

«QR-kod tek bıznes sýbektilerine beriledi. Kelýshi «Ashyq» mobıldi qosymshasyn óz telefonyna júktep, telefon nómiri boıynsha avtorızatsııalaýdan ótýi (JSN engizýi) jáne mekemeniń QR-kodyn skanerleýi qajet.

Tústerge bólý áleýmettik jelilerde talqylanǵandaı, adamdardyń ómirin «baqylaýǵa» jáne «qadaǵalaýǵa» arnalmaǵan. Bul naýqasty anyqtaıdy nemese adamnyń karantındegi patsıentpen jaqyn baılanysy bary-joǵyn kórsetedi.

«Ashyq» mobıldi qosymshasyn árkim óz erkimen qoldanady jáne ol qaýipsiz orta qalyptastyrýǵa, kelýshilerdi vırýs juqtyrý, indettiń taralý qaýpinen qorǵaýǵa baǵyttalǵan, sondaı-aq bızneske karantın kezinde qyzmetin jalǵastyrýǵa múmkindik beredi», - dep túsindirdi Densaýlyq saqtaý mınıstri.