Ashyq qosymshasy 2,5 myńnan astam adamnan «qyzyl» mártebeni anyqtady

NUR-SULTAN. QazAqparat – El kóleminde 2,5 myńnan astam adamnan Ashyq qosymshasy arqyly «qyzyl» mártebe anyqtaldy. Ol týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi Tsıfrlyq sheshimder departamentiniń dırektory Bolatbek Moldabekov málim etti, dep habarlaıdy QazAqparat tilshisi.

«El aýmaǵynda 2,5 myńnan astam adamnan «qyzyl» mártebe anyqtaldy. Bul adamdardyń PTR test anyqtamasy da oń nátıjeli jáne olar sony bile tura ushaqqa otyrǵysy nemese dámhanaǵa kirgisi kelgen. Árıne, kórsetkish aıtarlyqtaı. Tek Nur-Sultan qalasynyń ózinde «qyzyl» mártebemen 50-den astam adamdy ushaqqa otyrǵyzýdan bas tartyldy»,- dedi B. Moldabekov.

Sondaı-aq, departament basshysy nysandardyń Ashyq qosymshasynsyz da jumys isteı alatyny týraly aıtty.

«Keshe Ashyq júıesi jumys istemegende barlyq nysandarǵa eskertildi jáne eshqandaı kedergi bolǵan joq. Áýejaıda jolaýshylardy kedergisiz qabyldady. Júıe jumys istemegen jaǵdaıdyń ózinde, onyń adamdarǵa kedergisi tımeıdi. Áýejaı jáne basqa da nysandar óz kestesine saı jumys isteı beredi», - deıdi ol.

Buǵan deıin habarlaǵanymyzdaı, B.Moldabekov keshe Ashyq qosymshasynda oryn alǵan tehnıkalyq aqaýǵa qatysty túsinikteme berdi.