«Ashyq»-qa jumsalǵan aqshany tıimsiz ıgerildi dep qaramaımyz – Natalıa Godýnova
Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Tsıfrlyq Qazaqstan» baǵdarlamasyn iske asyrýdyń aralyq nátıjesine arnalǵan jıynda «Ashyq» qosymshasyn súıemeldeýge bólingen aqsha týraly pikir bildirdi.
«Pandemııa rejımi kezinde Memleket basshysynyń ózi bizge standarttan tys áreket etý kerektigin aıtty. Bizde birneshe joba boldy. «Ashyq» – sonyń bireýi. Men jaýapkershilikti óz monıyma aldym. «Jasaý kerek bolsa, jasaıyq. Bul bızneske kómek bolady» dedim. Onyń tıimdiligin asyra baǵalaý múmkin emes. 100 mln teńgeniń 20-30 mıllıony teńgesi ǵana súıemeldeýge ketti. Nátıjesinde biz bınestiń jumys isteýine múmindik jasadyq, sol tetik arqyly jaǵdaıdy qutqaryp qaldyq.
Maǵan ony qarjyny tıimsiz jumsalǵan joba retinde baǵalap, eskertý aıtýshylar bar. Iá, bıýdjettik protsedýralar bar ekeni túsinikti. Ónerkásipte qoldanysqa engizilgenge deıin júıeni súıemeldeýge aqsha bermeýim kerek ekenin aıtady. Al ónerkásipte qoldanysqa engizý úshin aqparattyq qaýipsizdik attestaty kerek. Ol attestatty alý úshin bıýdjet qarajaty kerek, ony alý úshin bıýdjettik tapsyrys jasaý qajet. Osylaı kete beredi. Sońy uzaqqa sozylady», - dedi Baǵdat Mýsın.
Respýblıkalyq bıýdjettiń atqarylýyn baqylaý jónindegi esep komıtetiniń basshysy Natalıa Godýnova «Ashyq» qosymshasynyń tıimdi bolǵanyn aıtyp, bul másele boıynsha mınıstrge eshqandaı min taǵylmaıtynyn jetkizdi.
«Tótenshe jaǵdaı kezeńi men pandemııaǵa, karantınge qatysty máselelerdiń bári daǵdarysqa qarsy sharalar aıasynda tekserildi. Densaýlyq saqtaý mınıstrligin, Іshki ister mınıstrligin, Ulttyq ulandy, Qorǵanys mınıstrligin tekserdik. Bul kezeńde atqarylǵan jumystyń bári erekshe jaǵdaıda isteldi. Sondyqtan tıimsiz jumsalǵan qarjy retinde qarastyrmaımyz. Eger memlekettik aýdıt qorytyndysynyń jobasynda ondaı másele bolsa, túzetemiz. Óıtkeni «Ashyq»-ty osynda otyrǵandardyń árqaısysy birneshe ret qoldanǵanyna senimdimin. Biz ol arqyly bıznestiń jumys isteýine, azamattardyń talaı nysanǵa shekteýsiz kirýine múmkindik berdik», - dedi komıtet basshysy.
