Ashyq: BQO-da karantın talabyn buzǵandarǵa 3,5 mln-ǵa jýyq teńge aıyppul salyndy
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, osy aıda úıinde oqshaýlanýy tıis 344 adamnyń (190-y – «qyzyl», 154-iniń «sary» mártebesi bar) Ashyq jobasyna qatysatyn nysandarǵa kelgeni anyqtaldy.
Solardyń eń kóbi (139-y – «qyzyl», 105-i – «sary») Oral qalasynda tirkelip otyr.
Osy derekter boıynsha QR Ákimshilik quqyqbuzýshylyq kodeksi 425-baby 1-bóligine sáıkes 80 hattama toltyrylyp, jeke tulǵalarǵa 3 mln 471,230 myń teńge aıyppul salyndy.
Departament basshysynyń sózine qaraǵanda, tamyz aıynda 3377 adamnyń koronavırýs juqtyrǵany belgili boldy.
Sońǵy aptada (20-26 tamyz) aldyńǵymen (13-19 tamyz) salystyrǵanda, aýrý juqtyrý kórsetkishi 4,8 paıyzǵa (875-ten 833-ke) tómendedi.
Óńirde «Delta» shtamynyń taralýyna baılanysty ınfektsııa 8-28 shilde aralyǵynda órshı túsip, kúnine orta eseppen 200-den astam naýqas tirkeldi.
Epıdemıologııalyq jaǵdaıdy turaqtandyrý maqsatynda birqatar qatań karantındik shekteýler qabyldanyp, sonyń nátıjesinde indet báseńdedi. Degenmen karantındik talaptar saqtalady.
Jańa oqý jylynyń bastalýyna jáne mektepterde sabaqtardyń dástúrli sıpatta júrgiziletinine baılanysty QR bas memlekettik sanıtar dárigeriniń 25 tamyzdaǵy №36 qaýlysy kúshine endi.
Mektepterde jumys jasaıtyn pedagogtar men qyzmetkerler túgeldeı ekpe alýy tıis. Sondaı-aq bilim ordalaryna kireberiste Ashyq qosymshasyn engiziledi.
Turǵyndardyń ekpe alyp, karantındik talaptardy saqtaýy asa mańyzdy.
«Eger synypta bir adamnan indet tabylsa, sol synyp 14 kúni boıy úı karantıninde oqshaýlanady. Bilim berý uıymdarynda bir aýysymnyń 30 paıyzdan astam synyptarynda kovıd tirkelse, sol aýysym da karantınge jabylady. Joǵary oqý oryndarynda, kolledjderde bir lek toptarynyń 30 paıyzdan astamynan koronavırýs tabylsa, sol lekke 14 kúndik karantındik shara qoldanylady», dedi M.Aryspaev.
Eske sala keteıik, budan buryn BQO-da 200 myńǵa jýyq adamnyń ekpe saldyrǵanyn, sońǵy aptada 20 adamnyń koronavırýstan qaıtys bolǵanyn habarladyq.
