«Ashyq» : Aqtóbede 200-den astam bıznes sýbektisi jumysyn kedergisiz júrgize alady
AQTÓBE. QazAqparat - Aqtóbelik kásipkerler «Ashyq» qosymshasyn engize bastady. Bul «qyzyl» aımaqta kedergisiz jumys isteýge múmkindik beretin joba, dep habarlaıdy QazAqparat tilshisi.
Aqtóbe oblysynyń kásipkerler palatasy bıznes ıelerine «Ashyq» qosymshasy týraly jan-jaqty túsindirý jumysyn júrgizip jatyr. QR-kod arqyly adamnyń mártebesin bilýge bolady.
«Birinshi kezekte qosymsha qyzmetkerler men kelýshilerdiń qaýipsizdigin qamtamasyz etedi. Munda kirgen adam qaýipsiz dep sanalady. Eger adamdy teksergende «qyzyl» tús kórsetilse, onda ol bizdiń ortalyqqa kire almaıdy. Ol ǵımarattan shyqqan soń birden dezınfektsııalaý jumysy júrgiziledi»,- dedi fıtnes ortalyq dırektory Nurqasym Ermahanov.
QR-kod tek bıznes sýbektilerine beriledi. «Ashyq» baǵdarlamasyna qatysýshy kásipker QR kodty alý úshin infokazakhstan.kz saıty arqyly ótinim beredi. Jobanyń talaptaryna sáıkestigi rastalsa jeke kabınette test rejıminde jumys isteýge múmkindik beretin kod paıda bolady. Qoǵamdyq tamaqtaný oryndary men kınoteatrlardyń ıeleri aldymen profıldi qaýymdastyqqa ótinish jiberip, sodan keıin infokazakhstan.kz saıtynan QR kodyn alýy kerek.
«Bul kásipkerlerdiń óz qyzmetin jalǵastyrýǵa múmkindik beretin jáne kelýshiler qaýipsizdigin qamtamasyz etetin múmkindik. Esep boıynsha, Aqtóbe oblysynda 200-den astam kásiporyn óz qyzmetin qaıta bastaıdy. Karantındik sharalary kezinde jumysyn toqtatqan ShOB ıeleri úshin tıimdi jol, mańyzdy qadam. Eger bıznes jumys isteıtin bolsa, bıýdjetke túsetin túsimder men basqa da mindetti tólemder bolatynyn túsinýi kerek», - deıdi Aqtóbe oblystyq kásipkerler palatasy dırektorynyń orynbasary Rýslan Kúıshinov.
