Ashyq: Aqmola oblysynda 8 adam karantın talabyn buzǵan
Vedomstvonyń málimetinshe, karantın talaptaryn buzýshylardyń eń kóp sany Býrabaı aýdanynda anyqtaldy. Halyqqa qyzmet kórsetý ortalyǵyna barǵan eki adamnyń «qyzyl» jáne «sary» mártebesi bar ekeni anyqtaldy. Osyǵan uqsas karatın talaptaryn buzý oqıǵasy Jarqaıyń aýdanynda anyqtaldy. Onda da «sary» mártebesi bar bir adam halyqqa qyzmet kórsetý ortalyǵyna barǵan.
«Sońǵy bir aptanyń ishinde tirkelgen «Ashyq» derekterine súıensek, oblys aýmaǵyna kelgen Nur-Sultan qalasy turǵyndarynyń karantındik talaptardy buzǵandary anyqtalyp otyr. Máselen, Nur-Sultan qalasynyń «qyzyl» mártebesi bar 2 turǵyny oblys aýmaǵyndaǵy qoǵamdyq tamaqtaný nysandaryna barǵan. Onyń biri, «qyzyl» mártebesi bar adam Kókshetaý qalasynda «Pınta» dámhana-baryna, ekinshisi, «qyzyl» mártebesi bar taǵy bir astanalyq Stepnogorsk qalasyndaǵy «Shanson» dámhanasyna barǵany anyqtaldy. Budan bólek, Nur-Sultan qalasynyń «sary» mártebesi bar turǵyny Tselınograd aýdanynda «Fazenda» dámhanasyna kirmekshi boldy», - dedi vedomstvodan.
Departament mamandary atap ótkendeı, Býrabaı aýdanynda ózin-ózi oqshaýlaý rejımin buzýshylar úı karantıni aıaqtalǵannan soń ákimshilik jaýapkershilikke tartylady. Al, astanalyq turǵyndarǵa qatysty turǵylyqty jeri boıynsha sharalar qabyldaý úshin Aqmola oblystyq sanıtarlyq-epıdemıologııalyq baqylaý departamenti materıaldardy Nur-Sultan qalasynyń departamentine joldady.
Aıta ketsek, «qyzyl» mártebesi bar adamdar sanıtarlyq talaptardy buzsa, olarǵa 30 aılyq eseptik kórsetkish nemese 87 510 teńge mólsherinde (QR ÁQbK 452-baby) aıyppul salynady.
