Ashyqtyq deńgeıi eń tómen jáne eń joǵary jergilikti bıýdjetter anyqtaldy - zertteý nátıjesi
ALMATY. 12 naýryz. QazAqparat - Búgin Almatyda bıýdjet úrdisterin baǵalaý salasynyń sarapshylary respýblıkalyq zertteý júrgizý nátıjesinde jergilikti bıýdjetterdiń ashyqtyq ındeksin jasap shyǵaryp, onyń nátıjesin búgin Almatyda ótken arnaıy
baspasóz máslıhatynda jarııalady jáne osy ındeksti memlekettik organdar qyzmetin baǵalaý jónindegi memlekettik júıege yqpaldastyrýdy usyndy.
Esterińizge sala ketsek, bul bastamany ótken 2011 jyldyń basynda Qazaqstannyń ulttyq bıýdjettik jelisi qolǵa alyp, oǵan Soros-Qazaqstan qory qoldaý kórsetti. 2010 jyly Soros-Qazaqstan qory bıýdjettiń ashyqtyq ındeksiniń tusaýkeserin ótkizip, sol jyly QR Qarjy mınıstrligi barshaǵa túsinikti bolatyn Azamattyq bıýdjetti jarııalaý jóninde sheshim qabyldady. Negizinen ulttyq bıýdjetterdiń ashyqtyǵy men tıimdiligin saralaýǵa baǵyttalǵan ındeksterdi engizý ıdeıasyn alǵash ret Halyqaralyq bıýdjettik seriktestik usynyp, 2010 jyly osyndaı ólshemderdi jergilikti deńgeıdegi bıýdjetterge qatysty ótkizý qajettiligin túsine otyryp, pılottyq joba retinde álemniń 10-ǵa jýyq elinde mundaı ındeksti jasaý isin qolǵa alǵan bolatyn. Qazaqstan qarjylyq jáne ózge de sebepterge baılanysty osy jobadan tys qalsa da, Soros-Qazaqstan qory ózdiginshe osyndaı zertteýdi júrgizý bastamasyna qoldaý kórsetti.
Soros-Qazaqstan Qorynyń baǵdarlamalar dırektory Aıda Aıdarqulovanyń aıtýynsha, Jergilikti bıýdjetterdiń ashyqtyq ındeksi 2011 jyly Qazaqstan Respýblıkasynyń barlyq 16 ákimshilik-aımaqtyq birliginen jınalǵan zertteý málimetteriniń negizinde jasalǵan. Onyń nátıjesinde ortasha respýblıkalyq kórsetkish 100 baldyń ishinen 50 baldy qurap otyr. Bul kórsetkish «ortashadan tómen» degen deńgeıge sáıkes keledi. «Barynsha ashyq bıýdjetter Atyraý jáne Qyzylorda oblystarynda (63 ball) baıqaldy. Ashyqtyq deńgeıi eń tómen jergilikti bıýdjetter Aqtóbe, Mańǵystaý jáne Batys Qazaqstan oblystarynda (37 jáne 32 ball) anyqtaldy. Osy zertteýdiń qorytyndysy boıynsha respýblıkalyq mańyzǵa ıe Almaty qalasy 100 baldyń ishinen 57 baldy jınady. Almatynyń bıýdjet ashyqtyǵy ındeksi bıýdjet jobasyn ázirleý kezindegi ashyqtyq (51 ball), bıýdjet úrdisiniń ashyqtyq deńgeıi (62), bıýdjet týraly aqparattyń ashyqtyǵy (59) sekildi parametrlerdiń negizinde anyqtaldy», - dedi Aıda Aıdarqulova.
Onyń pikirinshe, Indeks jerigilikti basqarý organdaryn aqparatty jáne esepti berýdegi ashyqtyq deńgeıin arttyrýǵa yntalandyryp, qaı aımaqtar óz azamattaryna bıýdjet úrdisine qatysýǵa kóbirek múmkindik beretinin anyqtaýǵa kómektespek. «Sondaı-aq, Indeks jergilikti bılik organdarynyń qyzmetin baǵalaýǵa arnalǵan pármendi quralǵa aınalyp, tıimdi bıýdjet saıasatyn qalyptastyrýǵa jaǵdaı jasaıdy», - dep esepteıdi ol.
«Alynǵan kórsetkish jergilikti bıliktiń ashyq aqparat kózderinde jarııalanatyn qarjy qyzmeti jáne bıýdjet týraly aqparatyna qoljetizýge bolatynyn dáleldeıdi, ıaǵnı qala turǵyndarynda jergilikti memlekettik basqarý organdary oblys qarjysyn qalaı jumsaıtynyn baqylaý jáne bıýdjet úrdisine qatysý múmkindigi bar ekenin bildiredi», - dedi «Namys» Joǵary bilimi bar múgedekter qoǵamy» QB tóraǵasy Qaırat Imanalıev.
