Ashyqqan ıt qolshatyrdy jep qoıdy
ASTANA. 3 qarasha. QazAqparat - Úsh apta boıy tamaqtandyrylmaǵan Peddı esimdi 2 jasar spanıel ashtan ólmes úshin qolshatyrdy jeýge májbúr bolǵan. Ittiń ishindegi qolshatyrdyń bóligin alyp shyǵý úshin jasalatyn otanyń qunyn bilgen ıttiń ıeleri ony veterınarlyq klınıkaǵa tastap ketken, dep habarlaıdy segodnya.ua.
Brıtanııalyq Kent Online portalynyń habarlaýynsha, 2 jasar spanıel Peddıdiń ıeleri ıtti asyrap alyp, oǵan múldem qaramaǵan kórinedi. Sol sebepti ıt únemi ash júrgen. Úsh apta boıy tamaqtandyrylmaǵan ıt qolshatyrdy taýyp alyp, amalsyzdan ony kemire bastasa kerek. Qolshatyrdyń metall bóligin jutyp qoıǵan ıttiń jaǵdaıy aýyrlap, onyń qınalǵan kúıin eki kún boıy baqylaǵan ıeleri ony veterınarlyq klınıkaǵa alyp kelgen.
Mamandarmen tildesý barysynda erli-zaıypty Pagslılar Peddıdiń qolshatyrdy jutyp qoıǵannan keıin, jaǵdaıy nasharlaǵanyn ańǵartqan. Itti teksergennen keıin dárigerler onyń ıelerine quny 400-den 1000 fýnt sterlıngk bolatyn ota jasaý kerektigin aıtqan. Mundaı somany estigen erli -zaıyptylar, janýarǵa ota jasaýǵa kelisimin berýin berip, artynan aqshasyn oılap, qashyp ketken.
Ábden aryp, jaǵdaıy ketken ıttiń ıeleri báriber zańnan bultara almady. Olarǵa 100 saǵat kóleminde qoǵamdyq jumys jasap, 1000 fýnt sterlıng kóleminde aıyppul tóleý týraly sheshim shyǵaryldy.
Qazir ıtke ota jasalyp, ol Koroldiktiń janýarlardy qorǵaý uıymynyń qaramaǵyna berildi.
