Ashyq partııaishilik saılaý – mańyzdy mindetterdi oryndaýǵa serpin beredi – Altaı Kólginov

NUR-SULTAN. QazAqparat - «Nur Otan» partııasy qalalyq fılıalynyń tóraǵasy, elorda ákimi Altaı Kólginov partııaishilik saılaý – praımerız astanada qalaı bastalǵany týraly aıtty, dep habarlaıdy QazAqparat tilshisi.

Qala basshysynyń sózinshe, búgingi tańda praımerızge qatysýǵa 40-tan astam azamat ótinish bildirdi, olardyń 9-y áıel, 20-sy 35 jasqa deıingi jastar.

«Elimizdiń saıası tarıhynda tuńǵysh ret praımerız respýblıkalyq partııaishilik saılaý aýqymynda ótedi. 2019 jyly «Nur Otan» partııasy saıası keńesiniń keńeıtilgen otyrysynda Tuńǵysh Prezıdent – Elbasy usynǵan «Senim. Dıalog. Bolashaqqa nyq qadam» partııa jumysyn júıeli jańǵyrtý baǵdarlamasy iske qosyldy. Basym baǵyttardyń biri – «ıadrolyq elektoratty» shoǵyrlandyrý: munda basym mindet – qala turǵyndary men qala úshin qajet bastamalardyń basynda bolatyn qoǵamnyń eń belsendi jáne bedeldi múshelerin biriktirý. Bul ashyq partııaishilik saılaý – «praımerız» mańyzdy mindetterdi oryndaýǵa serpin beredi.

Nursultan Ábishuly atap ótkendeı, praımerız – ár turǵynǵa óz úlesin qosýǵa, qala men eldiń damýyna óziniń kózqarasyn bildirýge múmkindik beretin áleýmettik lıft. 17 tamyzda bastalyp, 2020 jyldyń 3 qazanynda aıaqtalatyn praımerız barysynda Qazaqstan Respýblıkasy Parlamenti Májilisine nemese máslıhattarǵa aldaǵy saılaýǵa partııalyq tizimder jasalady. Elimizdiń barlyq aımaqtaryndaǵy partııa músheleri qoǵamnyń joǵary senimi men qoldaýy bar eń bedeldi partııa jetekshilerin derbes anyqtaıdy», – dedi elorda ákimi Altaı Kólginov.

Jalpy, elordada praımerızge 42 myńnan astam partııa músheleri daýys beredi. Daýys berý 1-2 qazan kúnderi onlaın rejımde ótedi. Belgili bir sebeptermen ǵalamtorda daýys bere almaıtyn partııa músheleri úshin 3 qazan kúni 39 saılaý ýchaskeleri ashylady. Olardyń árqaısysy beınebaqylaý júıesimen, kompıýterlik tehnıkamen jáne saılaýdyń ashyqtyǵyn qamtamasyz etetin basqa da atrıbýttarmen jabdyqtalady.