«Ashyq NQA» portalyndaǵy qazaqstandyqtardyń pikirleri jaýapsyz qalýda

ASTANA. QazAqparat - «Ashyq normatıvtik-quqyqtyq aktiler» portalynda qazaqstandyqtar qaldyrǵan pikirler jaýapsyz qalyp jatady. Bul týraly búgin QR Prezıdenti janyndaǵy Adam quqyqtary jónindegi komıssııanyń otyrysynda Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Ashyq NQA» portalynda memlekettik qyzmetter standarttaryn qosa alǵanda normatıvtik-quqyqtyq aktilerdiń  jobalary jarııa túrde talqylanady. Portal jumys istegen kezeń ishinde 29 143 normatıvtik-quqyqtyq akti jobasy jarııalanyp, olarǵa 14 myńnan astam pikir qaldyrylǵan. Alaıda, máselen 2018 jyldyń birinshi jartyjyldyǵyna qaldyrylǵan 5 myń pikirdiń 1906-sy jaýapsyz qalyp otyr. Sonymen qatar portal jumys istegen búkil kezeńde 6 myńnan astam NQA  jobasy onlaın-rejimde qosymsha talqylaýdan ótken joq», - dedi mınıstr.

Onyń aıtýynsha, tamyz aıynan beri memlekettik organdar «Ashyq NQA» portalynda retteýshilik áserdi taldaý nátıjelerine qoǵamdyq talqylaý júrgizýde.

«Kásipkerlerdiń de bıznes sýbektileri úshin engizilip jatqan jańa mindettemeler boıynsha ózderiniń pikirlerin onlaın rejimde bildirýge múmkindikteri bar», - dedi Dáýren Abaev.

Aıta keteıik, elimizde aqparatqa qoljetimdilikti qamtamasyz etýdegi aqparattyq-kommýnıkatsııalyq tehnologııalardyń erekshe rólin eskere otyryp, «Ashyq Úkimet» portaldary qurylǵan. Sonymen qatar  «Ashyq Úkimet» tujyrymdamasy aıasynda «Ashyq derekter», «Ashyq bıýdjetter», «Ashyq NQA», «Ashyq dıalog» jáne «Memlekettik organdar qyzmetiniń tıimdiligin baǵalaý» sııaqty ınternet-portaldar jumys isteıdi.