Ashyq esik kúni aıasynda 250-ge jýyq elordalyq AITV juqpasyna tekserildi
ASTANA. QazAqparat - Astana qalasynda 11 qarasha men 11 jeltoqsan aralyǵynda JITS-ke qarsy kúres aılyǵy ótýde.
Onyń sheńberinde búgin 5-shi qalalyq emhanada ashyq esik kúni uıymdastyryldy, dep habarlaıdy QazAqparat Astana qalalyq JITS-ke qarsy kúres ortalyǵynyń baspasóz qyzmetine silteme jasap.
Іs-shara barysynda qalanyń 250-ge jýyq turǵyny AITV-ǵa jedel testileýden ótti. Sondaı-aq Ortalyq mamandary ár kelýshige aqparattyq qaǵazdar taratyp, AITV/JITS-tiń aldyn alý boıynsha keńester berdi.
Astana qalalyq JITS-ke qarsy kúres ortalyǵy uıymdastyrý-ádistemelik bóliminiń meńgerýshisi Janna Aıtmaǵanbetqyzynyń aıtýynsha, sharaǵa qatysýshylardyń arasynda jastar kóp bolǵan jáne olar óz densaýlyqtaryna alańdaýshylyǵyn bildirgen.
«Men josparly túrde emhana dárigerine qaralýǵa kelgen edim. Sáti túsip, jedel test arqyly JITS-ke tekserildim. Mamandar taldaý nátıjesin 5 mınýttyń ishinde aıtyp berdi. Shyndyǵynda, qan tapsyrý úshin kez kelgen adam JITS Ortalyǵyna arnaıy bara bermeıdi. Sol sebepti mundaı is-sharalar jıi ótip tursa ıgi edi», - deıdi Astana qalasynyń turǵyny Názııa Erkinqyzy.
