«Ashyq derekter» portalyndaǵy málimetterdiń 20 paıyzy ózekti emes - Abaev
«Aqparatqa qoljetimdilikti qamtamasyz etýde aqparattyq-kommýnıkatsııalyq tehnologııalardyń erekshe rólin eskere otyryp, «Ashyq Úkimet» portaldary quryldy. Engizilip otyrǵan «Ashyq Úkimettiń» tujyrymdamasy «Ashyq derekter», «Ashyq bıýdjetter», «Ashyq normatıvtik-quqyqtyq aktiler», «Ashyq dıalog» jáne «Memlekettik organdar qyzmetiniń tıimdiligin baǵalaý» sııaqty ınternet-portaldardy qamtıdy», - dedi ol.
Mınıstrdiń atap ótýinshe, «Ashyq derekter» portalynda barlyq ortalyq memlekettik jáne jergilikti atqarýshy organdar mashına oqı alatyn formatta ártúrli málimetterdi ornalastyrady. Mundaı formattaǵy derekterdi jarııalaýdyń negizgi mindeti - qoǵamnyń memleket jınaǵan derekterdi qaıta paıdalanýyna jáne azamattar tarapynan suranysqa ıe servısterdi, onyń ishinde mobıldik servısterdi ázirleýge múmkindik berý.
«Búgingi kúni «Ashyq derekter» portalyna ornalastyrylǵan málimetter jıyntyǵy úsh myńnan asyp jyǵylady. Portal derekteri negizinde 23 qosymsha ázirlendi. Buǵan qosa, ornalastyrylǵan aqparattardyń shamamen 20 paıyzynyń ózektiligi joq ekendigin moıyndaý qajet. 2017 jyly jáne 2018 jyldyń ótken kezeńi ishinde jarııalanǵan derekter negizinde birde-bir qosyshma ázirlenbedi. Ornalastyrylǵan ashyq málimetter halyq, ǵylym jáne bıznes-qoǵamdastyq tarapynan álsiz talap etiledi», - dedi Dáýren Abaev.
Vedomstvo basshysynyń aıtýynsha, osyǵan baılanysty portalda jarııalanatyn ashyq málimetterdiń tizbesin keńeıtý maqsatynda bıznestiń, BAQ-tyń, ǵylymı-zertteý uıymdarynyń jáne halyqtyń basqa da sanattarynyń qajettiligin eskere otyryp, memlekettik organdardyń aqparattyq júıelerinde qamtylǵan derekterge saraptama júrgizilip jatyr.
«Búgingi kúni Eńbek jáne halyqty áleýmettik qorǵaý, Densaýlyq saqtaý, Ádilet jáne Ulttyq ekonomıka mınıstrlikteriniń aqparattyq júıelerinde qamtylǵan derekterdi taldaý aıaqtaldy. Úshinshi toqsannyń sońyna deıin Bilim jáne ǵylym, Іshki ister, Energetıka mınıstrlikteriniń aqparattyq júıelerine saraptama jasalatyn bolady», - dedi ol.
