Ashyq dalada jáne fıtnes ortalyqtarda jattyǵý kezinde neni eskerý kerek
ALMATY. QazAqparat – Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamentiniń bas mamany Gúlnar Mádımarova qala turǵyndaryna ashyq dalada jáne fıtnes ortalyqtarda jattyǵý kezinde neni eskerý kerektigin aıtyp, birqatar usynystar men keńester berdi, dep habarlaıdy QazAqparat tilshisi.
«Ashyq aspan aıasynda sportpen shuǵyldaný kezinde koronavırýs ınfektsııasyn juqtyrmaý maqsatynda jattyǵýshylar arasynda keminde 2 metr áleýmettik qashyqtyq saqtalýy qajet. Jattyǵý kezinde baılanys jasaýdan aýlaq bolý kerek, sporttyq jabdyqtardy (kilemshelerdi) paıdalanǵannan keıin jýyp, dezınfektsııalaý qajet», - dep keńes berdi Gúlnar Madımarova.
Sonymen qatar, ol fıtnes-ortalyqtardyń jumysy qalaı júzege asyrylatynyn túsindirdi. Almaty qalasynyń Bas memlekettik sanıtar dárigeriniń qaýlysyna sáıkes, sporttyq-saýyqtyrý ortalyqtary infokazakhstan.kz portaly arqyly nysannyń daıyndyǵy týraly habarlama berip, komıssııanyń oń qorytyndysyn alǵannan keıin óz qyzmetterin qalpyna keltire alady.
«Fıtnes ortalyqtarǵa qoıylatyn talap, 1 adamǵa 5 sharshy metr oryn bolýy tıis. Bul ortalyqqa kelýshiler sany 50% -dan aspaıdy degendik. Ortalyq jumysyn aldyn ala jazylý boıynsha uıymdastyrý kerek. Sport jabdyqtaryn, trenajerlerdi keminde 2 metr qashyqtyqta ornalastyrý shart. Toptyq sabaqtar kezinde belgiler qoıý arqyly oqýshylar arasyndaǵy áleýmettik qashyqtyqty saqtaýdy qamtamasyz etý qajet. Jalpy alǵanda, jattyǵý kezinde sportshylar arasyndaǵy ózara qarym-qatynasty azaıtý kerek. Bakterıtsıdti shamdar men aýa retsırkýlıatorlaryn qoldanǵan jón», - dedi Gúlnar Mádımarova.
Sondaı-aq, ol kelýshilerge koronavırýs ınfektsııasyn juqtyrýdyń aldyn alý maqsatynda, ár 2 saǵat saıyn oqý-jattyǵý protsesi ótkiziletin jumys oryndary men ǵımaratty jeldetý qajet ekenin atap ótti. Ǵımarattyń aýdanyna baılanysty qyzmetkerlerdiń klıenttermen tikeleı baılanysyn barynsha azaıtý, sport sabaqtaryn ótkizýdi qospaǵanda, kelýshilerdiń maska taǵyp júrýin qamtamasyz etý kerek.
«Óndiristik jáne turmystyq ǵımarattarǵa ár 3 saǵat saıyn ylǵaldy sanıtarııalyq tazalaý jumystaryn júrgizý mindetteledi. Atap aıtqanda, esiktiń tutqalary, elektr sóndirgishterdi, súıenishterdi, sporttyq jabdyqtardy, ústelderdi, oryndyqtardy, kıim iletin oryndardy, tamaqtaný, demalys bólmelerin, sanıtarlyq bólmelerdi mindetti túrde dezınfektsııalaý qajet»,– dep qortyndylady epıdemıolog.
