«Ashyq arna» jobasy halyqty pozıtıvti syn aıtýǵa úıretedi
ASTANA. QazAqparat - "Qazaqstan - 2050" qozǵalysy xalyq pen bılik arasyndaǵy konstrýktıvti dıalogty uıymdastyrýǵa arnalǵan "Ashyq arna" jobasyn qolǵa almaqshy, dep xabarlaıdy QazAqparat tilshisi.
"Bárimiz jaqsy bilemiz, osy ýaqytqa deıin xalyq memlekettiń san alýan sheshimderin talaı ret synaǵan edi. Ásirese, sol sheshimderdiń ashyqtyǵyna qatysty áńgimeler kóp boldy. Osydan keıin aqparattyq qoljetimdilik týraly zań qabyldanyp, "Ashyq Úkimet" atty platforma quryldy. Ókinishke qaraı, el azamattary atalǵan platformany jappaı qoldanyp ketken joq. Osyǵan baılanysty biz "Ashyq arna" jobasyn qolǵa alyp otyrmyz. Sonyń aıasynda el bolashaǵyna nemquraıly qaramaıtyn, belsendi azamattyq ustanymy bar adamdar "Ashyq úkimet" portalyndaǵy málimetterdi oı eleginen ótkizip, óz usynystaryn bere alady degen senim bar. Memleket ol usynystardy qaraýsyz qaldyrmaýy tıis", - deıdi jobanyń jetekshisi Ersaıyn Ospanov.
Onyń aıtýynsha, joba aıasynda arnaıy sarapshylar toptary qurylady. Oǵan kez kelgen adam kire alady. Toptar ekonomıka, normatıvtik aktiler, bıýdjet jáne taǵy basqa baǵyttar boıynsha jumys jasap, mańyzdy degen máselelerdi saraptamadan ótkizetin bolady. Sonyń negizinde usynystar daıarlanyp, qoǵam talqysyna shyǵarylady. "Sodan keıin biz barlyq usynystardy memlekettik organdar men Parlament Májilisine joldaıtyn bolamyz. Al osy jumystyń nátıjesi qandaı bolmaq? Osy bastamanyń arqasynda xalyqtyń pozıtıvti syn aıtý mádenıeti qalyptasady dep senemiz. El azamattary qandaı da bir problema týyndaǵanda memleketti jaı synap qana qoımaı, óz usynystaryn da jasaı alatyndaı, birlesip jumys isteıtindeı bolýy qajet", - dep atap kórsetti Ospanov.
