Ashyq ákimdik: Elordanyń 600-ge jýyq turǵyny ashyq esik kúnine qatysty
NUR-SULTAN. QazAqparat - Elordanyń barlyq aýdandyq ákimdikterinde «Ashyq ákimdik» ashyq esik kúni ótti, dep habarlaıdy QazAqparat ákimdik saıtyna silteme jasap.
Aýdan ákimderi qurylymdyq bólimshelerdiń ókilderimen birge turǵyn úı baǵdarlamalaryna qatysý, úlestik qurylys, jumysqa ornalastyrý, ataýly áleýmettik kómek alý jáne qosymsha bilim berý máselelerin qarastyrdy. Іs-sharaǵa elordanyń 600-ge jýyq turǵyny qatysty. Eń kóp adamdar Saryarqa aýdanynyń ákimdigine keldi. Ekinshi oryndy Almaty jáne Baıqońyr aýdandary bólisti.
QR Prezıdentiniń qoǵammen baılanysty nyǵaıtý tapsyrmasyn oryndaý maqsatynda qala ákimdiginde azamattardy qabyldaý turaqty túrde júrgiziledi. Bir jarym aı ishinde qala ákimi Altaı Kólginov azamattardy jeke qabyldaýynda 230 turǵyndy qabyldady, olardan 809 suraq tústi. Eń kóp ótinishter sany 175 balalardy mektepke daıyndaý jáne balalardy balabaqshaǵa kezekke qoıý, 157 turǵyn úı máselesi, odan eki ese az medıtsına, bıznesti damytý jáne ataýly áleýmettik kómek alý máseleleri boıynsha jolyqty.
524 ótinish boıynsha máseleler sheshildi, qalǵandary boıynsha jumystar júrgizilip keledi. Azamattardy qabyldaýǵa 6 balanyń anasy Saǵadatta kelip, óz suraqtaryn qoıdy. Saǵadat birneshe jyldan beri úı kezeginde tur. Bul kisiniń balalaryna «Mektepte jol» atty aktsııasy boıynsha kómek kórsetiletin bolady.
Qabyldaýda Qamysty aýyly boıynsha da ózekti máselelerge nazar aýdaryldy. Qarlyǵashtyń aıtýy boıynsha, adamdar sýdy kolonkadan tasıdy. «Aýrýhana alysta ornalasqan. Aýrýhanaǵa jetý úshin eki avtobýsty qoldanamyz», - dedi Qarlyǵash.
Qala ákimi Qamysty
kentine barýdy kestesine engizetinin atap ótti. Azamattardy qabyldaýǵa basqarma
basshylary, aýdan ákimderi, turǵyn úı qurylys jınaq bankiniń ókilderi qatysady.
Memlekettik organdar jergilikti jerde túsindirý jumystaryn júrgizip,
turǵyndardyń problemalyq suraqtaryna jaýap beredi.
