Ashýlanǵan boksshy beıkúná azamatty bir soqqymen ajal qushtyrdy
ASTANA. 29 qazan. QazAqparat - Saratov qalasynda jolda týyndaǵan janjaldyń sońy qaıǵyly oqıǵaǵa ulasty.
Beıkúná jandy ajal qushtyrǵan taı boksymen shuǵyldanatyn jergilikti turǵyn bolyp shyqty.
Boksshy óz kóligin jaıaý júrginshiler ótetin jol qıylysynda toqtatqan jáne ótip jatqandarǵa daýys kótergen. Olardyń biri mashınaǵa jaqyndaǵan sátte kóliginen shyǵa sala sózge kelmesten álgini basynan bir-aq urǵan. Soqqy tıgen adam asfaltqa qulap túsken. Al jýan judyryqty buzaqy mashınasyna otyryp, izin sýytqan. Zábirlenýshi esin jımaı aýrýhanada kóz jumdy. Boksshy ustaldy, qazir bul oqıǵa boıynsha qylmystyq is qozǵaldy.
