Ashtyqtan qurban bolǵandardyń rýhy azattyqty qasterleýge mindetteıdi - A.Smaıyl
ASTANA. 31 mamyr. QazAqparat - Búgin Astana jurtshylyǵy Saıası qýǵyn-súrgin jáne asharshylyq qurbandaryn eske alý kúnine oraı «1932-1933 jyldardaǵy asharshylyq qurbandarynyń rýhyna taǵzym» Monýmentine gúl shoqtaryn qoıdy.
Sharaǵa Qazaqstan Respýblıkasy Parlamentiniń, máslıhattyń depýtattary, memlekettik organdardyń, ǵylymı jáne shyǵarmashylyq zııaly qaýymnyń, azamattyq qoǵam ınstıtýttarynyń, sondaı-aq BAQ ókilderi qatysty.
«Jalpy 5-6 jylǵa sozylǵan ashtyqtan Qazaqstan dalasynda kóz jumǵandardyń sany ǵana 3,1 mln. adamnan asyp ketedi, keıbir ǵalymdar 3,3 mln-nan da asyryp jatyr. Sol kezde Ahmet Baıtursynulynyń aıtýynsha, sany 6 mıllıonǵa endi jetken qazaq úshin bul aýyr shyǵyn edi. Sol shyǵynnyń ornyn biz osy kúnge deıin óziniń deńgeıinde toltyra alǵanymyz joq», - dedi rásim barysynda QR Parlamenti Májilisiniń depýtaty Aldan Smaıyl.
Onyń atap ótkenindeı, ashtyq búgingi urpaqqa táýelsizdiktiń qunyn uǵyndyrady.
«Bizge ózimizdi ult retinde saqtaýǵa mindetteıdi ashtyqtan qurban bolǵandardyń rýhy. Bizge azattyqqa qol jetken otanymyzdy jas baladan bastap, kárimizge deıin qurmetteýdi mindetteıdi. Ult bolyp tutasýdy meńzeıdi», - dedi A.Smaıyl.
Bunyń aldynda atalmysh dataǵa oraı, Aqmol kentindegi Saıası qýǵyn-súrgin jáne totalıtarızm qurbandaryna arnalǵan «Aljır» murajaılyq-memorıaldyq kesheninde gúl shoqtaryn qoıý rásimi ótken bolatyn.
