Ashtyq jyldarynyń shyndyǵyn ashý úshin oǵan saıası baǵa berilýi kerek
ASTANA. 29 mamyr. QazAqparat - Ashtyq jyldarynyń shyndyǵyn ashý úshin oǵan saıası baǵa berilýi kerek. Bul pikirdi búgin L. Gýmılev atyndaǵy Eýrazııa Ulttyq ýnıversıtetiniń prorektory, fılologııa ǵylymdarynyń doktory Dıhan Qamzabekuly
BAQ ókilderine bergen suhbatynda aıtty.
Aıta ketý kerek, búgin Májiliste Qazaqstandaǵy jappaı asharshylyqtyń 80 jyldyǵyna baılanysty osy zulmattyń qurbandaryn eske alýǵa arnalǵan dóńgelek ústel bolyp ótti.
«Táýelsizdigin alǵan kezde Ýkraına memleketi ózderinde bolǵan alapat ashtyqty «golodomor» dep atap, onyń sebebin sol kezdegi ortalyqtyń júrgizgen saıasatynan ekenin ashyq baıandap, kináli adamdardy aıqyndady. Bizde ondaı saıası baǵa berilgen joq. Sondyqtan ashtyq oqıǵasynyń 80 jyldyǵyn atap ótýdiń maqsaty ǵalymdarymyz ben saıası qaıratkerlerimizdiń baǵa berýiniń alǵy sharttary dep oılaımyn», - dedi alash tarıhyn tereń zerttep júrgen ǵalym Dıhan Qamzabekuly.
Onyń pikirinshe, ǵylymı turǵydan jekelegen ǵalymdar tarapynan belgili bir jobalardyń jasalyp jatýy múmkin. Sol ashtyq zulmatyn Keńes tusyndaǵy úlken qyrǵyndardyń biri esebinde qaraýymyz kerek. Sonymen qatar D.Qamzabekuly 1920 jyldardaǵy qyrǵyndar jáne 1950 jyldardaǵy túrli demografııalyq aýytqýshylyqtardyń barlyǵy da keshendi túrde qarastyrylýy kerek dep esepteıdi.
«Búgingideı parlamentshilerdiń basqosýy, osy máseleni aıryqsha kóterýi óte oryndy. Ǵalymdardyń da pikirin estip, taldaý jasaý maqsatyn kózdep otyr. Qazaqstan Parlamenti de saıası sheshim shyǵaryp, naqty bir qaýly qabyldasa, durys bolar edi. Ashtyqtyń qurbandaryna jáne qýǵyn-súrginge ushyraǵandardyń urpaqtaryna baılanysty sheshim qabyldasa, tarıhı ádilettiliktiń ornaǵany bolar edi»,- dedi D.Qamzabekuly.
