Áshimbaev: Konstıtýtsııa boıynsha referendým — saıası júıeni demokratııalandyrý jolyndaǵy mańyzdy qadam
ALMATY. KAZINFORM – Parlament Senatynyń tóraǵasy Máýlen Áshimbaev Almaty qalasynda máslıhat depýtattarymen, jurtshylyqpen, etnomádenı birlestikterdiń múshelerimen jáne belsendi jastarmen kezdesti. Іs-sharalar barysynda jańa Konstıtýtsııa jobasynyń negizgi máni men aldaǵy respýblıkalyq referendým aıasyndaǵy birlesken jumystyń basym mindetteri talqylandy.
Máýlen Áshimbaev kezdesýge qatysýshylarǵa iltıpat bildirip, konstıtýtsııalyq reforma Memleket basshysy bastamashy bolǵan aýqymdy jańǵyrtýlardyń dáıekti jalǵasy ekenin atap ótti. Sondaı-aq ol bul saıası baǵdar ádilettilik, zań ústemdigi jáne bıliktiń qoǵam aldyndaǵy jaýapkershiligi sııaqty mańyzdy qaǵıdattarǵa taban tireıtinin aıtty.
— Prezıdentimiz Qasym-Jomart Kemeluly Toqaevtyń bastamasymen barlyq salada keshendi jańǵyrtýlar júzege asyrylyp jatyr. Konstıtýtsııalyq reforma — sol irgeli ózgeristerdiń zańdy ári dáıekti jalǵasy. Memleket basshysynyń Jarlyǵymen jańa Konstıtýtsııa jobasy respýblıkalyq referendýmǵa shyǵaryldy. Osylaısha, 15 naýryzda azamattar óz tańdaýyn jasaıdy. Bul — eldiń saıası júıesin demokratııalandyrý jolyndaǵy mańyzdy qadam. Jańa Ata Zańda memlekettilikti nyǵaıtýǵa, Táýelsizdikti kúsheıtýge jáne azamattardyń ómir súrý sapasyn arttyrýǵa basa mán berilgen. Sondyqtan konstıtýtsııalyq reforma zań men tártip qaǵıdatyna, azamattardyń quqyqtary men múddelerin qorǵaýǵa, qorshaǵan ortaǵa janashyrlyqpen qaraýǵa jáne ornyqty damý baǵdaryna taban tireıdi, — dedi Máýlen Áshimbaev.
Sonymen qatar Senat Tóraǵasy jańa Konstıtýtsııa jobasy «Ádiletti Qazaqstan» ıdeıasyn júzege asyrýdyń quqyqtyq negizin qalaıtynyna nazar aýdardy. Qujatta eldiń zııatkerlik áleýetin damytýǵa jáne halyqtyń birligin nyǵaıtýǵa berik kepil bolatyn basymdyqtar qamtylǵan. Bul jańa Ata Zańnyń adamǵa baǵdarlanýyn, mazmunynyń aıqyndyǵyn jáne qoǵamdy uıystyrýshy rólin aıqyn kórsetedi.
— Jańa Konstıtýtsııa jobasy — ótkenniń ınertsııasynan sanaly túrde arylyp, zamanaýı memlekettik modelge kóshý. Ata Zańdaǵy tujyrymdamalyq ózgeristerdiń biri adam quqyqtary men bostandyqtaryn memlekettiń eń joǵary qundylyǵy retinde bekitý ekeni anyq. Jańa Konstıtýtsııada dál osy qaǵıda memlekettik qurylym júıesiniń irgetasyna aınalady. Bul — «Ádiletti Qazaqstan» ıdeıasyn deklaratsııa deńgeıinde emes, naqty konstıtýtsııalyq normalar arqyly júzege asyrý degen sóz, — dedi Palata spıkeri.
Máýlen Áshimbaev jańa Konstıtýtsııa jobasyn tarıhı qujat dep atap, bul sheshim qoǵamdyq kelisimniń jańa úlgisine kóshý jáne ishki suranystar men syrtqy syn-qaterlerge berilgen ýaqytyly jaýap ekenin de tilge tıek etti. Ol konstıtýtsııalyq reformany saraptamalyq turǵydan ilgeriletýdiń mańyzyna toqtalyp, osy ıdeıalardy naqty tetikterge, aldaǵy ýaqytta qabyldanatyn zańdarǵa jáne quqyq qoldaný tájirıbesine tıimdi engizý qajet ekenin aıtty.
— Jańa Konstıtýtsııa aldaǵy jyldarda Qazaqstannyń turaqty, qaýipsiz ári serpindi damýyn qamtamasyz etetin memlekettik jáne saıası qurylymdy qalyptastyrýǵa negiz bolady. Bul qadam qazirgi jáne keleshektegi syn-qaterlerdi eńsere alatyn tıimdi júıe qurýǵa jol ashady. Qazir egemendikti kúsheıtýge, Táýelsizdikti nyǵaıtýǵa, elimizdiń qýatty damýyna jaǵdaı jasaýǵa jáne azamattardyń ál-aýqatyn jaqsartýǵa basa mán berýimiz kerek. Sonda ǵana Qazaqstan álemdik ekonomıka men saıasatta laıyqty ornyn ıelene alady, — dedi Senat tóraǵasy.
Talqylaý barysynda sarapshylar men taldaý ortalyqtarynyń ókilderi aldaǵy referendým aıasyndaǵy birlesken jumysqa qatysty usynys-oılaryn aıtyp, ózekti máseleler tóńireginde pikir almasty.
Sapar aıasynda Senat Tóraǵasy Abaı atyndaǵy respýblıkalyq mekteptiń materıaldyq-tehnıkalyq bazasymen, onyń ishinde BUU kabınetiniń jáne bilim ordasyndaǵy mýzeıdiń qyzmetimen tanysty. Sondaı-aq qalalyq kitaphana ujymymen jáne megapolıstiń belsendi jastarymen kezdesti. Odan bólek, senatorlar Yandex Qazaqstan-nyń keńsesine baryp, elimizdegi tsıfrlandyrý úderisterin odan ári damytý máselelerin talqylady.