Áshimbaev halyqaralyq qaýipsizdik týrasynda: barlyq áreket BUU jarǵysyna sáıkes bolýy tıis
ASTANA. KAZINFORM – Qazir álemdegi gýmanıtarlyq daǵdarystardyń ýshyǵýy jáne mádenı muralardyń qıraýy erekshe alańdatyp otyr. Bul týraly Álemdik jáne dástúrli dinder lıderleri Sezi hatshylyǵynyń basshysy – Qazaqstan Senatynyń tóraǵasy Máýlen Áshimbaev málim etti.
- Álemdik jáne dástúrli dinder lıderleri Sezi 20 jyldan astam ýaqyt boıy jahandyq dinaralyq dıalogty nyǵaıtýǵa úlken úles qosyp keledi. Osy aralyqta bul bastama ýaqyt synynan senimdi ótip, óziniń ómirsheńdigin dáleldedi. Búginde forým rýhanı kóshbasshylar men din qaıratkerleri, saıasatkerler men halyqaralyq uıymdardyń basshylary jáne úkimettik emes uıym ókilderi men sarapshylar bas qosatyn biregeı dıalog alańy retinde qalyptasty. Bul - osy mańyzdy iske atsalysqan barlyq qatysýshynyń birlesken jumysynyń naqty nátıjesi. Osyǵan oraı, barshańyzǵa Sez ben onyń Hatshylyǵyna kórsetip kele jatqan qoldaýlaryńyz úshin alǵysymyzdy bildiremiz, - dedi M. Áshimbaev Álemdik jáne dástúrli dinder lıderleri Sezi hatshylyǵynyń XXIII otyrysynda.
Onyń paıymynsha, 2022 jyly ótken jetinshi Sez álemdik dinderdiń birligi aıtarlyqtaı kúshke ıe ekenin aıqyn kórsetip berdi. Sondaı-aq álemdegi qaqtyǵystar men qaıshylyqtarǵa qaramastan, ashyq ári syndarly dıalog mádenıetterdi, halyqtar men dinderdi jaqyndastyra alatynyna naqty dálel boldy.
- Segizinshi Sezde mazmuny men máni osy sabaqtastyqty saqtap, qalyptasqan dástúrdi laıyqty jalǵastyrady dep senemiz. Hatshylyqtyń búgingi otyrysy osy baǵyttaǵy mańyzdy qadam ekeni anyq. Sondyqtan kezdesýimiz nátıjeli jáne tabysty bolsyn dep tileımiz. Biz halyqaralyq qatynastar júıesi ózgeristerge ushyrap, jańa syn-qaterler paıda bolǵan jáne burynǵylary shıelenise túsken kezeńde jınalyp otyrmyz. Qazir Ýkraınada, Gazada jáne basqa da aımaqtarda qaqtyǵystar saldarynan adamdardyń qaza tabýy bárimizdiń qabyrǵamyzdy qaıystyrady. Gýmanıtarlyq daǵdarystardyń ýshyǵýy jáne mádenı muralardyń qıraýy da alańdatyp otyr. Saıası tolqýlar, ıdeologııalyq qarama-qaıshylyq jáne senim daǵdarysy kúsheıe túskeni bárimizge belgili. Halyqaralyq qaýipsizdik tetikteri qaýqarsyzdyq tanytyp, protektsıonızm men birjaqty áreketter artýda. Mundaı jaǵdaıda janjaldy tek saıası dıplomatııalyq jáne beıbit jolmen sheshýge umtylý asa mańyzdy. Barlyq áreket BUU jarǵysyna jáne halyqaralyq quqyq normalaryna sáıkes bolýy tıis, - dedi Senat tóraǵasy.
Bul turǵyda ol álemdegi syn-qaterlerdi eńserý úshin barlyq konstrýktıvti jáne jasampaz kúshterdiń birlesip áreket etýi aıryqsha mánge ıe ekenin aıtty. Shyn máninde, álemdik dinder lıderleriniń judyryqtaı jumylýy jahandyq problemalardy sheshý, soǵystar men qaqtyǵystardy toqtatýǵa yqpal etý jáne dıalog pen ózara qurmet mádenıetin dáripteýge serpin beretini anyq.
- Qazirgi kúrdeli geosaıası jáne geoekonomıkalyq jaǵdaıda ártúrli iri memleketter arasynda qaıshylyqtar kóbeıgeni jasyryn emes. Osyndaı kezeńde pragmatızmge taban tiregen jáne syndarly ózara is-qımyl jasaı alatyn Qazaqstan sııaqty orta elderdiń róli artýda. Sol sebepti turaqtylyq pen dıalogty qamtamasyz etýde orta memleketterdiń kúsh-jigeri men din lıderleriniń moraldyq bedeliniń sınergııasy zor mańyzǵa ıe dep esepteımiz. Bul yntymaqtastyq jańa halyqaralyq bitimgershilik jáne gýmanıtarlyq bastamalarǵa tyń serpin beredi dep úmittenemiz, - dedi M. Áshimbaev.
Budan buryn habarlanǵandaı, Dúnıejúzilik ıslam lıgasy Qazaqstan rýhanı dıplomatııany nyǵaıtýdyń mańyzdy úlgisi bolǵanyn málimdedi.