Áshimbaev bıznestiń qanat jaıýyna tosqaýyl bolatyn sebepterdi atady

ASTANA. KAZINFORM — Áleýetti ınvestorlardy kúrmeýli bıýrokratııalyq kvestter qorqytady. Bul týraly Senat tóraǵasy Máýlen Áshimbaev «Vremıa» gazetinde jarııalanǵan maqalasynda jazdy. 

— Qazaqstan naryǵyndaǵy olıgopolııany jýasytý — Memleket basshysy shıkizattyq emes kiristerdiń ósýi men ekonomıkadaǵy qurylymdyq ózgerister jolynda qoıǵan birinshi júıeli mindet. Biraq, bıznestiń damýyna jáne úlken jumys isteýine kedergi keltiretin taǵy eki negizgi sebep bar — sybaılas jemqorlyq kedergileri jáne qarjy qarajatynyń qoljetimsizdigi: uzaq nesıeler men eleýli ınvestıtsııalar, — dedi Senat spıkeri.

Onyń paıymynsha, tehnologııalyq óndiristerdi damytýǵa qabiletti jeke bastamalardy bosatý úshin taza kásipkerlik táýekeldermen baılanysty emes kedergilerdi alyp tastaý qajet. Barlyq artyq tekserý — sybaılas jemqorlyqqa tikeleı jol. Sondyqtan Memleket basshysy jazalaý tásilinen úzildi-kesildi bas tartýdy talap etti. Ekonomıkalyq quqyq buzýshylyqtardy qylmyssyzdandyrý, bıznestiń quqyqtary men múddelerin qorǵaý jumystary bastaldy.

— Taǵy bir jemqorlyq tuzaǵy — bul ákimshilik kedergilerdiń tolyq tizbesi. Áleýetti ınvestorlardy kúrmeýli bıýrokratııalyq kvestter qorqytady. Mynadaı bolady: óndiris nysandaryn sala bastaý úshin ǵana shamamen 60 túrli ruqsat qajet. Qorytyndysynda, búkil álem ınvestorlarǵa eń jaqsy sharttar usynyp, olar úshin kúresip jatqanda bizde ekonomıkaǵa tikeleı ınvestıtsııalardyń jalpy jáne taza aǵyny birinshi jyl tómendep kele jatqan joq. Bul oraıda ákimshilik protsedýralardy barynsha tsıfrlandyrý, qujattardy qaraý erejelerin jeńildetý jáne standarttaý, «bir tereze» qaǵıdatyn engizý kómektesedi. Bıznestiń sheneýniktermen barlyq baılanysy ıesizdendirilgen túrde biryńǵaı platformaǵa aýystyrylýy tıis, — dedi ol.

Buǵan deıin Senat tóraǵasy ekonomıkanyń jekelegen strategııalyq sektorynda memlekettiń ustanymyn saqtaý básekelestikti burmalamaýy tıistigin aıtqan edi.