AShM jylqy sharýashylyǵyna qandaı sýbsıdııalar beriletindigin jarııalady
«1991 jyly Qazaqstandaǵy barlyq sanattaǵy sharýashylyqtarda jylqy sany shamamen 1,7 mln bas boldy. Odan keıingi naryqtyq ekonomıkaǵa kóshý kezinde mal sany kúrt azaıyp, 2000 jylǵa qaraı respýblıkadaǵy jylqy sany mıllıonǵa da jetpeı qaldy. Memleket 2002 jyldary qoldaý kórsete bastaǵannan keıin mal sanynda ósim baıqaldy. 2011 jyly asyl tuqymdy jylqylardy satyp alýǵa, qymyz ben jylqy etin óndirýge sýbsıdııa túrindegi memlekettik qoldaý iske qosyldy. Qabyldanǵan sharalardyń nátıjesinde Qazaqstanda búgingi tańda jylqy sany 2,9 mln basqa deıin ósti. Bul 1991 jylǵy jylqy sanynan 1,7 ese, al 2000 jylmen salystyrǵanda 3 ese kóp», - dep atap ótedi mınıstrlikten.
Sonyń nátıjesinde elimizde jylqy sharýashylyǵy men bıe sútiniń óndirisi damyp, asyl tuqymdy jylqylardyń sany artty. 2011 jyldan bastap memleket satyp alýdy sýbsıdııalap, olardyń úlesi 1,9 ese ósti. Búgingi tańda memleket jylqy sharýashylyǵymen aınalysatyn otandyq taýar óndirýshilerge qoldaý kórsetýdi jalǵastyrýda. Atap aıtqanda, satyp alynǵan asyl tuqymdy aıǵyrlar úshin sýbsıdııalaý normasy ár basqa 100 myń teńgeden; bıe sútin óndirýshiler úshin ár lıtrine 60 teńgeden; asyl tuqymdy jylqynyń analyq basyn baǵýǵa, jem-shóbine jylyna 20 myń teńgeden jáne jylqy sharýashylyǵyn damytýǵa arnalǵan tehnıkalar men jem-shóp daıyndaıtyn jabdyqtardy satyp alǵanda memleket 25 paıyzdyq óteý úlesimen ınvestıtsııalyq sýbsıdııa beredi. Bul qoldaý sharalarynyń barlyǵy jylqy fermalary men salalyq qaýymdastyqtardyń usynystary boıynsha jasalǵan. Jalpy alǵanda, 2019 jyly 4,7 myń jylqy fermalary memlekettik qoldaý sharalarymen qamtyldy.
«Sonymen qatar, joǵaryda atalǵan qoldaý sharalaryna qosymsha, jylqy ósirýshilerge «jylqy satyp alýǵa» 10 jylǵa deıingi 6 paıyzdyq jyldyq jeńildetilgen nesıe berý qarastyrylǵan. 2016 jyldan beri «Qulan» baǵdarlamasy jumys istep keledi. 2018 jyly 12 myń bas mal satyp alýǵa 512 sharýashylyq qarajat aldy. Byltyr 1 440 sharýashylyqqa 40 myńnan astam jylqy satyp alýǵa jeńil nesıe berildi. 2020 jyly qarjylyq qoldaý alýshylardyń sany edáýir artady dep kútilýde. Bul rette jylqy eti - tek ishki naryqqa baǵyttalǵan ónim ekenin atap ótken jón. Eksporttyq naryq múlde joq deýge de bolady«, - delingen vedomstvo málimetinde.
