AShM jýrnalısterdi qomaqty syıaqysy bar baıqaýǵa belsene qatysýǵa shaqyrýda
Baıqaýdyń negizgi maqsaty - agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy aıasynda «kooperatsııa» taqyrybyn keńinen nasıhattaý, dep habarlaıdy QazAqparat tilshisi.
«Baǵdarlama boıynsha aldaǵy bes jylda 500 myń jeke qosalqy sharýashylyqtardy biriktirip, 1200 kooperatıv qurý qarastyrylǵan. Sol arqyly aýylda shyǵyp jatqan ónimdi óndiriske jetkizý, sharýlardyń jaǵdaıyn jaqsartý degen úlken baǵyt bar. Osy baǵyt boıynsha aýyl sharýashylyǵy mınıstrliginde keshendi jumystar bastalyp ketti. Onyń bir sharasy, fermer.kz degen saıt quryldy. Ol - bir. Ekinshiden, osy kooperatsııany túsindirýge arnalǵan jumys toby quryldy. Úshinshiden, arnaıy baılanys ortalyǵy ashyldy. Ol jerden kooperatsııaǵa baılanysty barlyq suraqtarǵa tolyqqandy jaýap alýǵa bolady. Endi, osy jumystardyń barlyǵyn halyqqa jetkizetin buqaralyq aqparat quraldary bolǵannan keıin biz «QazAgro» ulttyq holdıngimen birlesip, jýrnalısterge arnalǵan «Kooperatsııa - aýyl bolashaǵy» atty baıqaýdy jarııaladyq. Konkýrstyń júlde qory 3 mıllıon teńgeden asady. Alaıda baıqaý bastalǵaly beri bizge eki-aq materıal joldandy. Men oılaımyn, konkýrstyń nátıjesi maýsym aıynda shyǵady degennen keıin jarnalıst áriptesterimiz jaıbasarlyq tanytyp jatyr. Jaqyndaǵan kezde bere salamyz dep oılaıtyn shyǵar», - dedi QR Aýyl sharýashylyǵy mınıstrligi qoǵammen baılanys basqarmasynyń basshysy Jasulan Ábdimanap QazAqparat tilshisine bergen suhbatynda.
Onyń aıtýynsha, demeýshilerdiń qarjysyn tartý arqyly baıqaýdyń júlde qoryn áli de ulǵaıtý josparlanyp otyr. Konkýrstyń qorytyndysy Jýrnalıster kúnine oraı jarııalanady.
Aıta keteıik, «Kooperatsııa - aýyl bolashaǵy» konkýrsy 1 aqpan kúni jarııalanǵan bolatyn. Baıqaýǵa respýblıkalyq jáne óńirlik BAQ-tyń kásibı jýrnalısteri, shtattyq jáne shtattan tys jýrnalıster, sondaı-aq Internet-BAQ ókilderi qatysa alady.
Nomınatsııalar: baspasóz (gazetter, jýrnaldar), radıo, teledıdar, ınternet-BAQ (onyń ishinde jańalyqtar agenttikteri).Qatysý týraly ótinim jáne konkýrstyq materıal 2017 jylǵy 10 maýsymǵa (osy kúngi saǵat 18.00) deıin pressminagri@gmail.com elektrondy poshtasyna qabyldanady. Salmaǵy 25 megabaıtqa jýyq materıaldar Google Drive, Oblako.Mail.ru, Yandex.Dısk jáne t.b. bultty servısteri arqyly joldanady.
Baıqaýǵa aǵymdaǵy jyly 1 qańtar men 10 maýsym aralyǵynda shyqqan nemese jarııalanǵan jumystar qabyldanady.Baıqaý erejesi men usynylý formasyn mgov.kz saıtynan tabýǵa bolady.