AShM jer qatynastary salasyn tsıfrlandyrý jónindegi zań jobasyn Májiliske engizbek
Bul týraly Úkimet otyrysynda Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
«Jer máselelerine qatysty álemdik tájirıbege taldaý jasaldy. Keńinen talqylaýǵa shyǵarylatyn birqatar usynys ázirlendi. 4 óńirde, atap aıtqanda Qostanaı, Aqmola, Shyǵys Qazaqstan, Mańǵystaý oblystarynda ǵaryshtyq monıtorıng boıynsha pılottyq joba iske asyrylýda. Pılottyq jobanyń birinshi kezeńi, jaıylymdyq alqaptar boıynsha aıaqtaldy. Ekinshi kezeń jyrtylǵan jerler boıynsha bastaldy. Ol jyl sońyna deıin aıaqtalatyn bolady», - dedi Saparhan Omarov.
Mınıstrdiń aıtýynsha, jer qatynastary salasyn tsıfrlandyrý jónindegi zań jobasynyń tujyrymdamasy ázirlengen. Ol jer ýchaskelerin elektrondyq formatta tikeleı usynýdy kózdeıdi. Talqylaý aıaqtalǵannan keıin zań jobasy osy jyldyń 15 qyrkúıegine deıin Parlament Májilisine engiziledi.
«Jekelegen shekteýlerdi saqtaý múmkindigi jaǵdaıynda egin jınaýdy qamtamasyz etý maqsatynda bıyl kóktemde synaqtan ótken Jumys algorıtmi iske qosylatyn bolady. Bul algorıtmge fermerlerdiń bógetsiz júrip-turýy, janar-jaǵarmaı men qosalqy bólshekterdi jetkizýi, sondaı-aq elektrondyq túrdegi jáne qaǵaz formattaǵy arnaıy ruqsattary kiredi», - dedi ol.