AShM veterınarlyq qaýipsizdik úshin «fermadan ústelge deıin» qaǵıdatty qolǵa almaq
«Búgin Eýrazııalyq ekonomıkalyq odaq quramyndaǵy qarym-qatynasqa baılanysty veterınarlyq talaptar, onyń ishinde tamaq qaýipsizdigi - ózekti másele. Veterınarlyq qaýipsizdikti qamtamasyz etý máselesine qatysty 2018 jyly respýblıka kóleminde 74 mıllıon dıagnostıkalyq zertteý júrgizý josparlanǵan. 142 mıllıon veterınarlyq egý sharasyn ótkizý qarastyrylǵan. Jalpy, qabyldanǵan stragetegııaǵa baılanysty Qazaqstan kóleminde sibir jarasyna qarsy barlyq beıim mal 100 paıyz egiledi», - deıdi QR AShM Veterınarlyq baqylaý jáne qadaǵalaý komıtetiniń tóraǵasy.
Tursyn Qabdoldanovtyń aıtýynsha, búgingi kúni Qazaqstan Respýblıkasy aýsyl indetinen taza aýmaq retinde halyqaralyq epıdomologııalyq bıýronyń resmı sertıfıkatyna ıe.
«Toǵyz aýmaq - aýsyldan taza vaktsına egilmeıtin aýmaq. Shyǵys, Ońtústik óńirlerdegi, Almaty, Qyzylorda, Jambyl óńirlerinde aýsylǵa beıim barlyq mal 100 paıyz egiledi. Sonymen birge iri-qaranyń arasynda týberkýlezge tekserý tolyǵymen júrgiziledi», - deıdi ol.
Komıtet tóraǵasy sonymen et ónimderiniń qaýipsizdigi týraly másele qozǵady.
«Jalpy, veterınarlyq jáne tamaq qaýipsizdigi bir-birimen tyǵyz baılanysty. Bul máseleni sheshýde qalyptasyp otyrǵan jaǵdaı: bir aýyl sharýashylyǵy mekemesi tól alynǵannan keıin ol tóldiń qulaǵyna salynǵan syrǵa, maldyń egilý, tekserilý sharalary jáne onyń tasymaldanýy, ósirilýi AShM quzyrynda bolsa, ónim alynǵannan keıingi másele Densaýlyq saqtaý mınıstrliginiń quzyrynda. Sondyqtan, búgingi kúni birlese osy jumysty bir ǵana mekemeniń quzyryna berý máselesi qaralýda», - dedi ol.
Tursyn Qabdoldanov et ónimderi tasymaldanǵan kezde kemshilikter shyqsa, onyń shyqqan tegin bilý quzyry Densaýlyq saqtaý mınıstrliginde joq ekenin aıtty.
Foto: krasnodubravsky.zemetchino.pnzreg.ru