AShM: Teri óńdeıtin 7 kásiporynǵa jeńildetilgen nesıe berildi

ASTANA. KAZINFORM — Aýyl sharýashylyǵy mınıstriniń orynbasary Erbol Tasjúrekov ortalyq kommýnıkatsııalar qyzmetinde ótken baspasóz máslıhatynda teri óńdeıtin kásiporyndardyń nesıesin memleket kepildendiretinin aıtty.

— Teri men jún óńdeý baǵyttary sońǵy 2-3 jyldyń ishinde qaıta qolǵa alyndy. Óıtkeni shynymen de kenje qalǵan salalar bolatyn. Búginde teri men jún óńdeýge memleket qarjylaı da, qarjylaı emes de qoldaý kórsete bastady. Qazir osy salaǵa aqsha salǵysy keletin ár ınvestormen jeke jumys istep, problemalaryn jergilikti ákimdiktermen birge sheshýge atsalysamyz. Bul baǵyttaǵy jobalar da kóp emes. Qazir 7 ınvestordyń qolynda 7 kásiporyn bar. Ázirge tek teri óńdeýmen aınalysyp otyr. Onyń ishinde jýyqta ashylǵan Batys Qazaqstan, Aqmola oblystaryndaǵy kásiporyndar da bar. Onyń bári jergilikti áleýmettik-kásipkerlik korporatsııalar men Agrarlyq nesıe korporatsııasynan jeńildetilgen paıyzben nesıe aldy. Nesıeniń mólsherlemeleri 2,5-6 paıyz, — dedi vıtse-mınıstr. 

Erbol Tasjúrekov mundaı ınvestorlarǵa «Damý» qory da qoldaý kórsetetinin aıtty.

— Olardy aınalym qarajatymen tolyqtaı qamtamasyz etý jónindegi baǵdarlama qarastyrylǵan. Ondaı kásiporyndar nesıe alýǵa kepildikteri joq bolsa, «Damý» qory arqyly 85 paıyzyn memleket kepildendiredi. Qazir osy másele pysyqtalyp jatyr. Jerigilikti bıýdjetter arqyly arnaıy qarajat bólemiz, — dedi ol.

Resmı málimet boıynsha, elimizde sıyr terisiniń 78%-y óńdelmeıdi.