AShM tasqynnan qyrylǵan maldyń resmı sanyna kúmán keltirgenderge jaýap berdi

ASTANA. KAZINFORM – Aýyl sharýashylyǵy vıtse-mınıstri Amanǵalı Berdalın Senat otyrysynda tasqynnan qyrylǵan maldyń resmı sanyna kúmán keltirýshilerge jaýap berdi. 

«El arasynda tasqyn saldarynan 12 myń bas mal qyrylǵany jalǵan degenge saıatyn sóz tarap júr. Buǵan ne deısizder?» dep surady jýrnalıst.

Amanǵalı Berdalın tasqynnan qyrylǵan maldyń bári túgel esepke alynǵanyna senimdi ekenin jetkizdi.

«Bylaı dep aıtaıyq. Osy turǵan ýaqytta dalada jatqan bir bas mal joq. Aýyl sharýashylyǵy mınıstrliginiń epızootıkalyq jasaqtary bar. Sol jasaqtar óziniń 45 kóligimen, 100-den astam adamymen, jergilikti ákimdikterdiń mal dárigerlerimen birge jabylyp júrip, shyǵynǵa ushyraǵan maldyń bárin kádege jaratty. Ýtılızatsııa jasalǵannan keıin ol maldyń bári esepke kirdi. Sondyqtan úıde otyryp kóp áńgime aıtýǵa bolady. Biraq biz naqty joıylǵan maldyń esebimen alyp otyrmyz. Búgingi tańda dalada jatqan mal kórip turǵan joqpyz», - dedi vıtse-mınıstr.