AShM sút ónimderi boıynsha ımportty almastyrý josparymen bólisti
Josparly jumys týraly aýyl sharýashylyǵy mınıstrliginiń alqa májilisinde vıtse-mınıstr Aıdarbek Saparov aıtyp berdi, dep habarlaıdy QazAqparat tilshisi.
«Memlekettik baǵdarlama aıasynda mal sharýashylyǵyn damytýdyń salalyq ınvestıtsııalyq baǵdarlamalary iske asyrylyp jatyr. Etti mal sharýashylyǵynyń negizgi baǵyty sharýa qojalyqtaryn qurýǵa baǵyttalǵan. 2019 jyly 82,1 myń bas iri qara mal jáne 374,4 myń bas qoı satyp alý úshin qarjylandyryldy. Nátıjesinde iri qaramen aınalysatyn 840 jańa sharýashylyq quryldy. Bul 2018 jylmen salystyrǵanda 38 paıyzǵa artyq. 2019 jyldyń qorytyndysy boıynsha qoı sharýashylyǵynda 1057 jańa sharýashylyq quryldy», - dedi Aıdarbek Saparov.
Vıtse-mınıstr sonymen qatar ımportty almastyrý maqsatynda sútti mal sharýashylyǵyn damytý baǵdarlamasy júzege asyrylyp jatqanyn eske saldy.
«2019 jyly 7,4 myń basy bar 30 otbasylyq taýarly sút ferma qarjylandyrylyp, iske qosyldy. Salalyq baǵdarlamanyń kórsetkishterine 2020 jyly qol jetkizý úshin 25 ónerkásiptik TSF (taýarly sút ferma) jáne jalpy qýaty keminde 15 myń bas saýyn tabynymen 30 otbasylyq TSF qurý qajet. Osyǵan baılanysty barlyq óńirdi osy baǵdarlamany júzege asyrýda muqııat nazar aýdarýdy suraımyn», - dedi ol.