AShM sút óńdeý kásiporyndarynyń júktemesi 77%-dan aspaýynyń sebebin túsindirdi

ASTANA. QazAqparat - Búgingi kúni Qazaqstanda qýattylyǵy 2,5 mln tonna ónim shyǵaratyn 172 sút óńdeý kásiporyny jumys isteıdi. Bul rette elimizde qajetti sút-shıkizat kóleminiń jetispeýi sebebinen olardyń júktemesi 77%-dan aspaı otyr, dep habarlaıdy QR AShM baspasóz qyzmeti.

2021 jylǵy qurǵaqshylyq pen azyq-túliktiń qymbattaýyna baılanysty shaǵyn fermerler men jeke qosalqy sharýashylyqtar mal basyn azaıtty, bul sút jınaý kóleminiń tómendeýine ákeldi.

Bul máseleni sheshý úshin elimizdiń barlyq óńirlerinde sút-taýar fermalarynyń jelisin qura otyryp, SQO tájirıbesin kóbeıtý boıynsha joba jumys isteıdi. Ony iske asyrýǵa bıyl 100 mlrd teńge bólindi. Oblys ákimdikteriniń ótinimderine sáıkes, jylyna 373 myń tonnaǵa deıin sút óndiretin 65 jobany qarjylandyrý josparlanyp otyr. Nesıeleý qaǵıdalarynyń jobasy ázirlendi, oǵan sáıkes nesıe merzimi 10 jylǵa deıin, nesıeniń eń joǵary somasy – 5 mlrd teńge, syıaqynyń nomınaldy mólsherlemesi jyldyq 2,5% - dan aspaıdy.

Budan bólek 2025 jylǵa deıin jumys istep turǵan sút óńdeý kásiporyndaryn jańǵyrtý boıynsha 20-ǵa jýyq ınvestıtsııalyq jobany iske asyrý kózdelip otyr.

Atalǵan STF sany men qýaty jergilikti óndiris esebinen sút ónimderine ishki qajettilikti tolyq qamtamasyz etýge jáne otandyq sórelerdegi ımporttyq taýarlardyń kólemin azaıtýǵa múmkindik beredi. Qazaqstandyq sút ónimderine, onyń ishinde elden tys jerlerde turaqty suranys bolǵan jaǵdaıda, qosymsha STF jáne sút zaýyttarynyń qurylysy týraly aıtýǵa bolady.

Sonymen birge elimizde óńdeýshi kásiporyndardyń aýylsharýashylyq ónimin tereńdete óńdep ónim óndirýi úshin ony satyp alý shyǵyndaryn sýbsıdııalaý qaǵıdalaryna ózgerister kúshine endi. Innovatsııalar sary maı, men qatty irimshik sııaqty jáne qurǵaq sút ónimderdiń óndirisi men naryqqa shyǵýyn arttyrýdy kózdeıdi. Qaǵıdalarda sýbsıdııalardy esepteý tek kórsetilgen ónimderdi óndirý úshin shıki sútti jumsaý boıynsha júrgiziledi.

Engizilgen ózgeriske sáıkes sýbsıdııalardy tóleý úshin eń mańyzdy kórsetkish satylǵan ónimniń kólemi bolyp tabylady, ol óndirýshiniń EShF nemese banktik tólem qujattary arqyly aqsha túsýimen rastalady.

Bul tásil memlekettik qoldaýdyń osy túriniń tujyrymdamasyna tolyq sáıkes keledi, óıtkeni ónimderdi sata otyryp, óndirýshiler ishki naryqty ımportqa táýeldi azyq-túlik túrlerimen qanyqtyrýǵa tikeleı qatysady.

Usynylǵan ózgerister sýbsıdııalar bólýdiń barynsha ashyq, ádil jáne adal tártibin qamtamasyz etedi dep sanaımyz.