AShM sýbsıdııalaý úderisin avtomattandyrýdy josparlap otyr

ASTANA. QazAqparat - QR Aýyl sharýashylyǵy mınıstrligi aýyl sharýashylyǵy taýarlaryn óndirýshilerdi sýbsıdııalaý mehanızmin jetildirýde. Ózgertýler agroónerkásip keshenin (AÓK) sýbsıdııalaýynyń birneshe baǵyttary boıynsha ázirlenýde. Bul týraly búgin OKQ-da ótken brıfıngte QR Aýyl sharýashylyǵy mınıstrliginiń jaýapty hatshysy Arman Evnıev aıtty.

"Birinshiden, bólinip jatqan sýbsıdııalardyń tıimdiligin joǵarylatý men tólemdi ońtaılandyrý jáne ashyqtyqty qamtamasyz etý maqsatynda sýbsıdııany berý protsesin avtomattandyrý josparlanyp otyr. Óıtkeni búginde oblystarda, aýdandarda sýbsıdııalaýǵa qatysty qujattardyń kóptigi sonsha, qaǵazdardy mashınamen tasýda. Osyǵan baılanysty búginde mınıstrlik aýylsharýashylyq taýarlaryn óndirýshilerge sýbsıdııany bólýdegi álemdik tájirıbeni zertteýde. Sonymen qatar jobany Eýropa qaıta qurý jáne damý banki arqyly qarjylandyrý máselesi qarastyrylýda", - dep atap ótti ol.

Onyń aıtýynsha, ekinshi baǵyt eginshilik sharýashylyǵyn saqtandyrý, tuqym sharýashylyǵyn, balyq jáne etti mal sharýashylyǵyn sýbsıdııalaý júıesine qatysty bolmaq.