AShM sýarmaly jerler baǵdarlamasyn ázirledi
Vıtse-mınıstr Arman Evnıevtiń aıtýynsha, agroónerkásip keshenin damytý baǵdarlamasy aıasynda 2021 jylǵa deıin 610 myń gektar jerdi, onyń ishinde aǵymdaǵy jylda 60 myń ga jerdi aınalymǵa tartý josparlanǵan.
«Qazirdiń ózinde 42 myń gektar sýarmaly jer aınalymǵa engizildi. Qalǵan jerler jyldyń sońyna deıin engiziletin bolady. Atalǵan mindetti oryndaý maqsatynda Islam damý banki, sondaı-aq, Eýropa qaıta qurý jáne damý bankimen birlesip, 100 mıllıard teńgeden astam somaǵa 128 myń gektar jerdiń gıdromelıoratsııalyq júılerin qalpyna keltirý jumystary júrgizilýde. Budan bólek, taǵy da 1,5 mıllıon gektar jańa sýarmaly jerlerdi aınalymǵa tartyp, sýarmaly jerlerdiń aýmaǵyn 3,5 mıllıon gektarǵa deıin jetkizý kózdelip otyr», - dedi A.Evnıev Úkimettiń búgingi otyrysynda.
Al QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev sýarmaly jerlerge qatysty salalyq baǵdarlamanyń ázirlengenin jetkizdi.
«Bizde sýarmaly jerlerdi damytýǵa arnalǵan salalyq baǵdarlama daıyn. Osy jeltoqsan aıynda ony Úkimettiń qaraýyna shyǵaramyz. Qazir qarjy jáne ekonomıka mınıstrlikterimen birge qarastyryp jatyrmyz. Menińshe, ol óte jaqsy baǵdarlama bolady», - dedi Ó.Shókeev.
Aıta keteıik, otyrysta agroónerkásip keshenin damytý baǵdarlamasy qaraldy. QR Aýyl sharýashylyǵy vıtse-mınıstri Arman Evnıevtiń aıtýynsha, búgingi tańda balyq, asyl tuqymdy jylqylar, qoı eti, bal, bıdaı, bıdaı kebegi, soıa burshaǵy, raps, sıyr eti, jonyshqa, un, ósimdik maıy, arpa men júgeri úshin Qytaı naryǵy ashyq.
«Osynyń arqasynda 9 aıdyń ishinde Qazaqstannan Qytaı eline aýyl sharýashylyǵy ónimderiniń eksporty 42 protsentke ulǵaıdy. Iran tarapynan tiri qoıdy, tońazytylǵan jáne salqyndatylǵan qoı etin, sıyr etin, taǵamdyq jumyrtqany jetkizýge arnalǵan veterınarııalyq talaptar kelisildi. Bıyl tiri iri qara malǵa qoıylatyn talaptardy kelisý josparlanyp otyr. Sondaı-aq, iri qara jáne usaq maldy Saýd Arabııasyna, al et pen et ónimderin, taýyq jumyrtqasyn Birikken Arab Ámirlikterine jetkizýge qatysty shekteýler alynyp tastaldy», - dep atap kórsetti A.Evnıev.
Mınıstrler kabıneti jańa baǵdarlamanyń tujyrymdasyn maqulady.