AShM: Sıyr terisiniń 84 paıyzy bosqa qalyp jatyr
ASTANA. KAZINFORM – Aýyl sharýashylyǵy mınıstrligi Agrarlyq azyq-túlik naryqtary jáne aýyl sharýashylyǵy ónimin qaıta óńdeý departamentiniń dırektory Nazgúl Hatepova eldegi sıyr terisiniń 16 paıyzy ǵana qajetke jaratylatynyn aıtty.
«Salada keıbir problemalyq máseleler bar. Sonyń biri – aýyl sharýashylyǵy ónimderin óńdeý deńgeıiniń tómendigi. Mysaly, sútti óńdeý úlesi 52%, maıly daqyldarda – 45%, ette – 41%, dándi daqyldarda – 30%, jemister men kókónisterde – 3%». Ekinshi másele – óńdeý kásiporyndarynyń júktelý deńgeıiniń tómendigi. Mysaly, et óńdeý qýatynyń júktelýi 54%, makaron ónimderinde – 42%, unda – 36%, jarmada – 23%, júnde – 26%, teride – 6,3%», - dedi departament dırektory baspasóz máslıhatynda.
Mınıstrliktiń resmı málimeti boıynsha, jyl saıyn alynatyn teri men júnniń 84 paıyzy qajetke jaratylmaıdy.
2023 jyly óndirilgen 3,5 mln iri qara terisiniń tek 6%-y (208 myń) óńdelgen, 10%-y (348 myń) eksporttalǵan, al qalǵan 84%-y (2,971 myń) óńdelmeı qalǵan.
Buǵan deıin 26 qazannan bastap Qazaqstan aýmaǵynan úshinshi elderge jáne Eýrazııalyq ekonomıkalyq odaq elderine ógizsheler men toqtylardy eksporttaý kvotasyn bólý qaǵıdalary kúshine enetinin jazǵan edik.
