AShM sıyr etiniń baǵasy qalaı esepteletinin túsindirdi

ASTANA. KAZINFORM — Aýyl sharýashylyǵy mınıstrligi elimizdegi sıyr eti baǵasyna qatysty túsindirme jasady.

Aýyl sharýashylyǵy mınıstrligi sıyr eti baǵasyna qatysty birqatar buqaralyq aqparat quraldarynda týyndaǵan túsinbeýshilikke baılanysty túsinikteme berdi.

Vedomstvo atap ótkendeı, ettiń kılogramyna 3 400–3 500 teńge — bul sıyr etiniń óndirýshilerdegi ortasha kóterme baǵasy.

— Elordadaǵy saýda núktelerinde et jetkizý, saqtaý jáne basqa da obektıvti shyǵyndar eskerile otyryp satylady. Sonyń nátıjesinde Astanada bólshek saýdadaǵy baǵa kılogramyna 3 700–4 300 teńgege deıin jetedi. Al qabyrǵa-jaýyryn bóligi, áleýmettik mańyzy bar azyq-túlik tizimine engizilgendikten jáne bul sanatqa saýda ústemesi 15%-dan aspaıtyndyqtan, kılogramyna 3 100–3 400 teńge baǵamen satylady, — dep túsindirdi mınıstrlik.

AShM málimetinshe, óńirlerde ettiń bólshek saýdadaǵy ortasha baǵasy kılogramyna 3 500–4 300 teńge quraıdy. Al joǵary deńgeıli bólikterdiń (sıyr fılesi, qalyń jáne jińishke jıegi, beldiń bir bóligi) jáne basqa da bólikterdiń (jambas eti, ish maıy jáne t. b.) baǵasy memleket tarapynan rettelmeıdi, naryqtyq jolmen qalyptasady.

Budan buryn habarlanǵandaı, Premer-mınıstrdiń orynbasary — Ulttyq ekonomıka mınıstri Serik Jumanǵarın Qazaqstandaǵy sıyr etiniń baǵasy álem boıynsha eń arzany dep aıtqan edi.