AShM Sybaılas jemqorlyqqa qarsy jańa standartty bekitti
ASTANA.KAZINFORM — Aýyl sharýashylyǵy mınıstrligi parasattylyq mádenıetin damytýǵa jáne memlekettik basqarýdaǵy sybaılas jemqorlyq kórinisteriniń aldyn alý júıesin nyǵaıtýǵa arnalǵan Sybaılas jemqorlyqqa qarsy jańa standartty bekitkeni belgili boldy.
Qujat «Sybaılas jemqorlyqqa qarsy is-qımyl týraly» Zańdy oryndaý maqsatynda ázirlengen jáne sybaılas jemqorlyq qaterin taldaý men kartaǵa túsirý, múddeler qaqtyǵysyn retteý, satyp alý rásiminiń ashyqtyǵyn arttyrý jáne qoǵammen ashyq dıalog qalyptastyrýdyń biryńǵaı tásildemelerin bekitedi.
Jańa standartta:
- sybaılas jemqorlyq táýekelderine keshendi taldaý júrgizý,
- olardy kartalaý jáne sybaılas jemqorlyq kartogrammasyn qalyptastyrý,
- múddeler qaqtyǵysynyń aldyn alý,
- Sybaılas jemqorlyqqa qarsy mádenıetti qalyptastyrý,
- mınıstrliktiń resmı ınternet-resýrsynda negizgi josparlar men esepterdi jarııalaý,
- sondaı-aq Qoǵamdyq keńestiń qatysýyn qamtamasyz etý,
- personaldy basqarý protsesterinde sybaılas jemqorlyqtyń aldyn alý,
- memlekettik satyp alý salasynda sybaılas jemqorlyqtyń aldyn alý qarastyrylǵan.
— Standartty qabyldaý Qazaqstannyń Sybaılas jemqorlyqqa qarsy saıasat tujyrymdamasyn iske asyrýdaǵy mańyzdy qadamy ári memlekettik organdar qyzmetiniń ashyqtyǵyn arttyrýǵa, azamattar men bıznestiń senimin nyǵaıtýǵa qyzmet etedi, — delingen habarlamada.
Budan buryn bıdaı men júgeri óńdeý salasyna 2,6 mlrd dollar ınvestıtsııa tartylatynyn jazǵanbyz.