AShM: Shetelde qazaqstandyq qyryqqabatqa degen suranys tómendep ketti
Mınıstrliktiń málimdeýinshe, álemde koronavırýstyń taralýy saldarynan azyq-túlik taýarlaryna degen suranystyń ósýi aıasynda Qazaqstan bastapqyda qyryqqabat, pııaz jáne sábiz sııaqty kókónisterdi eksporttaýǵa ýaqytsha tyıym salynǵan.
«Tyıym eldiń azyq-túlik qaýipsizdigi jáne óz halqymyzdy jetkilikti mólsherde azyq-túlik ónimderimen qamtamasyz etý maqsatynda engizilgen. Bul sheshim eski daqyl qorynyń az bolýyna baılanysty shyǵaryldy. Qalaı bolǵanda da, byltyrdan qalǵan qordy jańa ónim alý kezeńine deıin jetkizý qajet boldy.
Tyıym salý týraly buıryq 22 naýryz kúni ishki ónimderdi shetelderge jappaı shyǵarýǵa baılanysty qabyldandy. Sondaı-aq, buıryq 11 kún ǵana áreket etti. 2 sáýirden bastap tyıym alynyp tastalyp, sharýalar belgilengen kvotalar sheńberinde qyryqqabat, pııaz jáne sábizdi eksporttaýǵa múmkindik aldy. Osy ýaqyt ishinde 4 myń tonnaǵa jýyq qyryqqabat eksporttaldy. Fıtosanıtarlyq sertıfıkattar ýaqytyly berildi, ótinim bergenderge eshqandaı kedergi bolǵan joq», delingen habarlamada.
Óńirlik turaqtandyrý qorlary ishki tutynýǵa qajetti kólemdi satyp alǵannan keıin, 14 sáýirde shekteýdi tolyǵymen alyp tastaǵan.
«Tyıym alynyp tastalǵannan soń, 20 myń tonnadaı qyryqqabattyń 971 eksporttyq sertıfıkaty berildi. Bıylǵy jyly qyryqqabatty jappaı jınaý 10 sáýirde bastaldy. Osylaısha, eldiń ońtústigi jańa ónimge qol jetkizgen soń, Aýyl sharýashylyǵy mınıstrligi barlyq tyıym salýlar týraly buıryqtyń kúshin joıdy.
Ósirilgen qyryqqabat kóbine Reseı Federatsııasyna, Ýkraına men Belarýs elderine shyǵarýǵa arnaldy. Alaıda, karantınniń keńinen engizilýine jáne eksporttyq-ımporttyq qatynastardyń shektelýine, sondaı-aq sýpermarketterdiń, dúkenderdiń, bazarlardyń, meıramhanalardyń jáne basqa da saýda oryndarynyń jabylýyna baılanysty qazaqstandyq qyryqqabatqa degen suranys ishki naryqta da, shetelde de kúrt tómendedi», delingen habarlamada.
Eske slaa ketsek, Túrkistan oblysynyń ákimi Ómirzaq Shókeev Úkimetten óńirdegi sharýalardyń qyryqqabatyn ótkizip berýge kómek surady. Onyń aıtýynsha aımaqta qazir satylmaı jatqan 250 myń tonna qyryqqabat bar.