AShM shegirtke taralatyn oshaqtardyń elektrondyq kartasy jasaıdy

ASTANA. QazAqparat - Búgin Jambyl oblysynda Qazaqstan Respýblıkasy aýyl sharýashylyǵy vıtse-mınıstri Gúlmıra Isaeva shegirtke zııankesterine qarsy kúresti uıymdastyrýǵa tehnıka men qural-jabdyqtardyń daıyndyǵymen tanysty, dep habarlaıdy QazAqparat QR AShM baspasóz qyzmetine silteme jasap.

2018 jyly zııandy jáne asa qaýipti zııandy organızmderdiń jáne karantındi obektilerdiń taralýy 5,1 mln gektar alańda, onyń ishinde úıirli shegirtke zııankesteri 1,92 mln gektar, dándi daqyldardyń aýrýlary 2,4 mln gektar, saıaq shegirtkeler 444,0 myń gektar alańda taralady dep boljam jasalǵan..

Asa qaýipti zııandy organızmderge jáne karantındi organızmderge qarsy qorǵaý is-sharalaryna respýblıkalyq bıýdjetten 3,57 mlrd teńge bólindi.

Búgingi kúni shegirtke zııankesterine qarsy qorǵaý is-sharalaryn ýaqytyly uıymdastyrý úshin úıirli shegirtkelerge qarsy 1,9 mln gektar alańda óńdeý júrgizýge pestıtsıdterdi jetkizý jónindegi, sondaı-aq olarǵa hımııalyq óńdeýler júrgizýge kelisimsharttar jasaldy.

Respýblıka boıynsha barlyǵy 540 birlik búrikkish tehnıkasyn jumyldyrý josparlanýda (37 ushaq, 31 asa jeńil avıatsııa (AJA), 33 aerozoldi generator, 141 ýltra az kólemdegi búrikkish (ÝAKB) jáne 192 ıyqqa iletin búrikkish).

Búgingi tańda Ońtústik Qazaqstan oblysynda marokko shegirtkesine qarsy hımııalyq is-sharalar júrgizilýde.

Jambyl, Almaty, Qyzylorda, Shyǵys Qazaqstan oblystary ókilderi qatysqan jıynda G.Isaeva shegirtkemen kúres jobasy boıynsha qoldaý jáne tájirıbelik kómek kórsetý úshin marokkolyq FAO-nyń halyqaralyq sarapshysyn tartý josparda ekenin atap ótti. 2018 jyldyń 25 sáýirinen bastap halyqaralyq tájirıbelerdi eskere otyryp, óńdeýge jatatyn alańdardyń ulǵaıýyna áser etetin faktorlardy anyqtaý jónindegi jumystar júrgiziletin bolady.

Shegirtkege jáne olardyń taralýyna monıtorıngti júrgizýdi naqty baqylaý úshin GPS trekerler men GPS navıgatorlar qoldanylatyn bolady, olar GAJ júıesin paıdalana otyryp koordınattardy jáne tıisti salystyrýlar jolymen respýblıka aýmaǵynyń fıtosanıtarlyq jaı-kúıin, onyń ishinde óńirlerdegi shegirtkeler boıynsha naqty kórinisin kórsetetin bolady. Tsıfrlandyrý sheńberinde asa qaýipti zııandy organızmderdiń, onyń ishinde shegirtke zııankesteriniń taralý oshaqtarynyń elektrondyq kartasy qurylady jáne kartaǵa túsirý jumystary júrgiziletin bolady.