AShM Reseıden et tasymaldaýǵa nelikten shekteý engizilgenin túsindirdi

ASTANA. KAZINFORM — Veterınarııalyq baqylaý jáne qadaǵalaý komıteti tóraǵasy Qazbek Tashımov Reseıdiń birqatar óńirinen mal men et jetkizýge engizilgen tyıymnyń sebebin atady. 

— Reseı Federatsııasynyń shekaralas aımaqtaryna qatysty engizilgen shekteýlerge toqtalsaq, bul sheshim Qazaqstan aýmaǵyna aýrýlardyń taralýyn boldyrmaý úshin qabyldandy. Jalpy, kórshiles elderdegi epızootııalyq jaǵdaıdy únemi baqylap otyramyz. Qazirgi ýaqytta Qazaqstandaǵy epızootııalyq jaǵdaı turaqty, — dedi Qazbek Tashımov Úkimet otyrysynan keıingi baspasóz máslıhatynda.

Onyń aıtýynsha, shekteýler pasterellezdiń taralýy qaýipine baılanysty engizildi.

— Reseı Federatsııasynda pasterellez anyqtalǵannan keıin, osyndaı shekteý engizý týraly sheshim qabyldandy, dep naqtylady komıtet basshysy.

Osy oraıda ol kórshi eldegi ónimderdiń qaýipsiz ekeni rastalǵannan keıin shekteýler joıylatynyn aıtty.

Aıta keteıik, buǵan deıin Aýyl sharýashylyǵy mınıstri Aıdarbek Saparov sıyr etin elden zańsyz eksporttaý múmkindigine qatysty pikir aıtty.