AShM: Reseı men Belarýsten ákelingen qus eti men shujyqtan zııandy zattar anyqtaldy

ASTANA. QazAqparat - Qazaqstan Respýblıkasyna ákelingen azyq-túlik ónimderdiń quramynda tyıym salynǵan jáne zııandy zattar anyqtaldy. Bul týraly Aýyl sharýashylyǵy mınıstrliginiń baspasóz qyzmetine siltememen «QazAqparat» HAA habarlaıdy.

QR AShM azyq-túlik ónimderine monıtorıngtik zertteý júrgizý qorytyndylary boıynsha, reseılik jáne belarýs ónimderiniń normalarǵa bastapqy sáıkessizdikti anyqtaýyna baılanysty Reseıdiń Agapov aýdanynan ákelingen broıler balapandarynyń etinen daıyndalǵan ragýda mezofıldi aerobty jáne fakýltatıvtik anaerobty mıkroaǵzalar sanynyń kóp bolýyn anyqtap, kúsheıtilgen zerthanalyq qadaǵalaý rejımin engizgen.

Sondaı-aq, reseılik «Blagoıar» saýda belgisiniń qatyrylǵan broıler balapanynyń sıraǵynan mezofıldi aerobty jáne fakýltatıvtik anaerobty mıkroaǵzalardyń kóp bolýy, Reseıdiń Stavropol ólkesinde, Chelıabınsk oblysy, Nagaıbakskıı aýdanynda shyǵarylatyn broıler balapandarynyń etinen jasalǵan qatyrylǵan jartylaı fabrıkattar, sorpa jıyntyǵynan patogendik mıkroaǵzalar, sonyń ishinde salmonella anyqtalǵan.

Zerthanalyq zertteý qorytyndylary boıynsha, Reseıdiń Mordovııa Respýblıkasynda «Atıashevskıı» et óńdeý kesheninde shyǵarylatyn ónimderdiń arasynda V kategorııasyndaǵy «Ýtrennıe» qatyrylǵan shujyq ónimderinen ishek taıaqshasy tobynyń bakterııalary anyqtaldy.

Al Belarýs Respýblıkasynyń «Drýjba» qus fabrıkasy AAQ-da daıyndalatyn broıler balapany etinen patogendik mıkroaǵzalar, sonyń ishinde salmonella anyqtalǵan.