AShM orman órtteriniń aldyn alý úshin «Eýrokopter» tikushaqtaryn satyp almaq
ASTANA. 14 qyrkúıek. QazAqparat - Aldaǵy ýaqytta qarjy máselesi sheshilgennen keıin biz «Eýrokopter» tikushaqtaryn satyp alatyn bolamyz.
Bul týraly «QazAqparat» tilshisine suhbat bergen QR Aýyl sharýashylyǵy mınıstrligi Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti.
Komıtet tóraǵasy atap kórsetkendeı, búginde qorǵanys salasy boıynsha shyǵarylatyn «Eurocopter EC 145» tikushaqtaryn orman órtteriniń aldyn alý jumystary úshin paıdalaný máselesi jan-jaqty zerdelendi.
«Jalpy, orman sharýashylyǵyna osyndaı 6 tikushaq qajet. Osyǵan baılanysty komıtet tıisti qarajatty 2013 jylǵy bıýdjetten qarastyrýǵa ótinish bergen. Biraq Qarjy mınıstrligi ony qoldaǵan joq. Endi, ol máseleni 2014 jylǵy bıýdjet josparyna engizý josparlanyp otyr. Negizi, búginde barlyq másele osy qarjyǵa tirelip otyr. Ol sheshilýi tıis. Biz «Eýrokopter» tikushaqtaryn alýymyz qajet», - deıdi E.Nysanbaev.
