AShM ońtústiktegi shegirtke shabýyly týraly: durys statıstıka berilmegen

ASTANA. KAZINFORM — Aýyl sharýashylyǵy mınıstrligi bıyl shegirtkeler 2,1 mln gektar jerge ǵana taraıdy dep boljap otyr. 

— Shegirtkemen kúres jumysy keshendi túrde iske asyrylyp jatyr, oǵan el boıynsha 4,5 myńnan astam adam tartylyp, 400-den astam tehnıka jumyldyryldy. Qazir barlyq oblysta shegirtkemen kúres jumysy qyzý júrip jatyr, — dedi Aýyl sharýashylyǵy vıtse-mınıstri Ermek Kenjehanuly ortalyq kommýnıkatsııalar qyzmeti alańynda ótken baspasóz máslıhatynda.

Sala mamandarynyń boljamyna sáıkes, bıyl el aýmaǵynda shegirtkeniń taralý alqaby 2,1 mln gektar jer dep otyr. Ótken jylǵa qaraǵanda 1 mln gektarǵa az.

— Ótken jylmen salystyrǵanda shegirtkeniń taralý aımaǵy azaıyp kele jatyr. Ekinshiden berilgen aqparatta tıisti dáıek joq, ıaǵnı durys statıstıka berilmegen, — deıdi ol.

Vıtse-mınıstrdiń málimdeýinshe, shegirtkeler kem degende 5 mln gektar jerdi sharpıdy degen aqparat taraǵan, al mınıstrlik ókili 2,1 mln gektar jerge ǵana taraıdy dep otyr.

— Biz bul aqparatpen kelispeımiz, — dep qysqa qaıyrdy Ermek Kenjehanuly.

Aıta ketsek, Aýyl sharýashylyǵy mınıstrligi ońtústik óńirlerde shegirtke qaptap ketkeni týraly aqparatty buǵan deıin de joqqa shyǵarǵan edi. 

Eske salaıyq, Túrkistan oblysy jyl saıyn shegirtkeden zardap shegedi. Ásirese, násibin jer anadan tergen sharýalar úshin jaǵdaı qıyn.