AShM: Óńirlerge qus tumaýyna qarsy 7,7 mln vaktsına bólindi

NUR-SULTAN. QazAqparat – Qazaqstannyń qus tumaýy taraǵan óńirlerine 7,7 mln doza vaktsına bólindi. Bul týraly OKQ-daǵy brıfıngide QR AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov málimdedi, dep habarlaıdy QazAqparat tilshisi.

«Janýarlardyń asa qaýipti aýrýlarynyń aldyn alý boıynsha bekitilgen veterınarııalyq is-sharalar josparyna sáıkes, osy jyldyń aqpan aıynda vaktsınatsııa júrgizý úshin qus tumaýyna qarsy 3,3 mıllıonnan astam vaktsına bólindi. Sonymen qatar qosymsha qyrkúıek aıynda qus tumaýyn juqtyrý oshaqtaryn oqshaýlaý úshin respýblıkalyq rezervten 3,1 mln doza bólindi. Al osy aptanyń sońynda taǵy 1,3 mln doza jetkiziledi. Osylaısha, óńirlerge baratyn vaktsına dozalarynyń sany 7,7 mıllıonǵa jetedi. Vaktsınatsııa tegin júrgiziledi», - dedi komıtet basshysy.

Onyń aıtýynsha búgingi kúni májbúrli vaktsınatsııa aıasynda Qazaqstannyń 8 oblysynyń 60 aýdanynyń 424 aýyldyq okrýginde 1,7 mln qusqa vaktsına salynǵan. Sonymen qatar, Tursyn Qabdoldanov qus ósirýshiler odaǵymen jáne jumyrtqa óndirýshiler qaýymdastyǵymen kelisilgen strategııa boıynsha respýblıkalyq bıýdjet esebinen tek analyq tabynǵa, sondaı-aq qus fabrıkalarynyń aınalasyndaǵy 20 shaqyrymdyq aımaqtaǵy jeke aýladaǵy qustarǵa jáne jabaıy qustardyń ushý jolyna profılaktıkalyq vaktsınatsııa júrgiziletinin atap ótti.

«Qoldanystaǵy veterınarlyq zańnama aıasynda qus fabrıkalarynyń ózderi vaktsınatsııa júrgizedi. Bul rette broıler baǵytyndaǵy qus fabrıkalary broılerdiń ómir súrý merziminiń az bolýyna (36-40 kún) baılanysty vaktsınatsııa júrgizbeıdi. Olar bir táýlik balapandar men ınkýbatsııalyq jumyrtqany qus fabrıkalarynan alady. Onda analyq qus tumaýǵa qarsy vaktsınatsııalanǵan. Jumyrtqa baǵytyndaǵy qus fabrıkalary analyq taýyqtardy vaktsınatsııalaıdy», - dep qosty spıker.