AShM óńirlerdi mal ólekselerin órteıtin peshtermen qamtýdy kózdep otyr
ASTANA. 17 qyrkúıek. QazAqparat - Aýyl sharýashylyǵy mınıstrligi elimizdiń óńirlerin mal ólekselerin órteıtin peshtermen qamtýdy josparlaıdy.
Bul týraly búgin Parlament Májilisinde ótken Úkimet saǵatynda Aýyl sharýashylyǵy mınıstri Asyljan Mamytbekov málim etti.
«Búgingi tańda aýrý maldardyń barlyǵyn joıǵanda biz olardy jerge kómip jatyrmyz. Ary ketkende qalyń betondalǵan «Bekker shuńqyryna» tastap, betin jaýyp qana jatyrmyz. Al ol jerlerde sý tasqyny bolsa, nemese qandaı da bir basqa da tótenshe jaǵdaılar oryn alyp jatsa, sonyń saldarynan onda tastalǵan aýrý ólekseler qaldyǵy jer betine shyǵar bolsa, bunyń ózi bizdiń bolashaǵymyz úshin bıologııalyq bombamen birdeı», - deıdi A. Mamytbekov. Bul rette mınıstr aýrý maldardyń ólikterin órteıtin zamanaýı tehnologııalar bar ekenin, onyń qorshaǵan ortaǵa qaýipsiz ekendigin alǵa tartty.
Onyń aıtýynsha, qazirgi ýaqytta mınıstrlik elimizdiń barlyq eldi mekenderin aýrý mal ólekselerin órteıtin peshpen qamtamasyz etý máselelerin qarastyryp jatyr. «Kelesi jyldan bastap óńirlerde ólekse órteıtin ártúrli tıptegi peshterdi ornatý jónindegi ilki jobany iske qosý josparda bar», - deıdi A. Mamytbekov.
