AShM «Ohotzooprom» bylyqtaryn áshkereledi
Mınıstrlik málimetine sáıkes, kásiporynnyń negizgi qyzmeti janýarlar áleminiń, olardyń tirshilik ortasynyń jáne bıologııalyq alýantúrliliginiń saqtalýyn qamtamasyz etý, janýarlar álemin qorǵaý salasyndaǵy quqyq buzýshylyqtardyń aldyn alý jáne kúresýge baǵyttalǵan keshendi sharalardy júzege asyrý bolyp sanalady.
"Degenmen, tekserý nátıjesinde jaýapty laýazymdy tulǵalardyń da, qatardaǵy qyzmetkerlerdiń de tarapynan óreskel buzýshylyqtar anyqtaldy. 2018 jyly jeke tulǵalarǵa qarsy qyzmettik qarýdy zańsyz paıdalaný, ósimdikter men janýarlardyń sırek kezdesetin túrlerin zańsyz ustaý, sonymen qatar qarýdy zańsyz satyp alý, saqtaý jáne tasymaldaý faktileri tirkeldi", - dep atap ótedi vedomstvodan.
Kásiporyn ınspektorlarynyń ózderiniń baqylaýyndaǵy aýmaqtarda brakonerlik jasaǵandyqtary da anyqtalǵan. Máselen, 2019 jyldyń 17-21 mamyry aralyǵynda Qorǵaljyn memlekettik tabıǵı qoryǵynyń aýmaǵynda atylǵan 147 kıik óleksesi tabylǵan. Jedel sharalardy júrgizý barysynda atalǵan qylmysty jasaý kúdigimen 6 adam ustalsa, olardyń 2-eýi "Ohotzooprom" ınspektory bolyp shyqty. Bul fakti boıynsha qylmystyq is qozǵalǵan.
"Jemqorlyq quqyq buzýshylyq faktileri de bar. 2018 jyly Aqtóbe óńirlik fılıalynyń basshysy para alǵany úshin qylmystyq jaýapkershilikke tartylsa, bıyl Batys óńirlik fılıalynyń basshysy kásiporynǵa tıesili avtokólikterdiń jóndelgendigine qatysty oryndalǵan jumystar aktisine qol qoıǵany úshin para alý kúdigimen ustaldy", - dedi mınıstrlikten.
Vedomstvo málimetinshe, ótken jyly kásiporyn ınspektory tarapynan tabıǵatty qorǵaý zańnamasynyń 289 ret buzylǵany anyqtalǵan. Onyń 235-i ákimshilik quqyq buzýshylyq bolsa, 154-i qylmystyq is sanalady.
"Mınıstrlik júrgizgen tekserýdiń qorytyndysy boıynsha "Ohotzooprom" ÓB qyzmetkerleriniń tarapynan oryndalatyn quqyq buzýshylyqtardyń aldyn alý sharalary, kadrlardy irikteý talaptary qatańdatylatyn bolady", - delingen taratylǵan aqparatta.