AShM-nyń qoǵamdyq keńesi ulttyq parkterdegi jerdiń durys paıdalanyp jatqanyna kúmánmen qarady

ASTANA. QazAqparat - QR Aýyl sharýashylyǵy mınıstrliginiń qoǵamdyq keńesi elimiz boıynsha asa qorǵalatyn jerlerdegi ákimshiliktiń qyzmetine kúmánmen qarap otyr. Bul týraly búgin Qoǵamdyq keńestiń alǵashqy otyrysynda Aýyl sharýashylyǵy mınıstri Asyljan Mamytbekov málim etti.

«Mınıstrliktiń bastamasy boıynsha asa qorǵalatyn aýmaqtardyń, atap aıtsaq, ulttyq parkterdiń, qoryqtar men osyndaı maqsattaǵy ózge de jerlerdiń ákimshiligi janynan qoǵamdyq keńes qurdyq. Ótken aptada Almatyda qoǵamdyq keńestiń jıynyn ótkizdik, sonda kózimiz jetkeni: birqatar osyndaı mekemelerdiń basshylary bul bastamany qýana qoldaı qoımady. Bálkim olardyń jasyratyn dúnıeleri bar shyǵar nemese olarǵa qyzmetin qoǵamnyń qadaǵalaýy unamaıtyn shyǵar»,-dedi mınıstr.

A.Mamytbekovtiń aıtýynsha, qoǵamdyq keńestiń maqsaty - asa qorǵalatyn aýmaqtardaǵy jerlerdiń durys maqsatta paıdalanyp jatqanyna kóz jetkizý. Mınıstrdiń aıtýynsha, asa qorǵalatyn jerler satylmaıdy.

«Bul týraly zań 15 jyldan beri jumys istep keledi, ıaǵnı, rekreatsııalyq maqsattaǵy jerler 49 jylǵa deıin paıdalanýǵa beriledi. Biraq, qoǵam bul zań jańadan kúshine engendeı ábigerge túsip júr. ıAǵnı, asa qorǵalatyn jerlerge qatysty kóp protsess jabyq ótip jatqanyn kórsetedi»,-dep atap ótti A.Mamytbekov.