AShM men Et odaǵynyń arasynda eshqandaı teketires joq – Dáýren Abaev

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev «Aýyl sharýashylyǵy mınıstrligi men Qazaqstannyń et odaǵynyń arasynda teketireske qandaı pikir bildirer edińiz?» degen suraqqa jaýap berdi, dep habarlaıdy QazAqparat tilshisi.

«Eń aldymen, munda eshqandaı teketires joq. Bul – qalypty jumys úrdisi. Kez kelgen reformanyń artyqshylyqtary men kemshilikteri, jaqtaýshylary men dattaýshylary bar. Taǵy da qaıtalap aıtsam, bul kádimgideı qalypty sharýa. Taraptar jarııaly túrde óz argýmentterin aıtyp jatyr», - dedi Dáýren Abaev «Ashyq dıalog» baǵdarlamasynda.

Mınıstrdiń aıtýynsha, bir qaraǵanda, memleket etti shetelge ótkizýge nıetti eksporterlarǵa qarsy shyǵyp jatqandaı kórinedi.

«Biraq, jaǵdaı olaı emes. Bul amalsyzdan barǵan qadam. Ol týraly birshama aıtylyp ta jatyr. Aýyl sharýashylyǵy mınıstrligi men «Atameken» ulttyq kásipkerler palatasynda da bul jaıly kóp aıtyldy. Endi qarańyz, ótken jyly ǵana kóbeıtý maqsatynda elimizge 60 myń bas iri qara ákelingen. Mal basyn ary qaraı ósirip, ishki naryqtyń qajettiligin jabý úshin árbir bas, álbette, sýbsıdııalandy. Alaıda bilýimshe dál osy ýaqytta Qazaqstannan syrtqa 160 myńǵa tarta mal shyǵarylǵan. Osynyń saldarynan otandyq et kombınattary jartylaı qýatta ǵana jumys isteýge májbúr boldy», - dedi ol.

Dáýren Abaev mal syrtqa shyǵarylǵannan keıin Qazaqstannyń óz ishinde mal men ettiń baǵasy kóterilip, ımportty almastyrý isinde de másele týyndaıtynyn aıtyp ótti.

«Aqyry, álbette, tutynýshy zardap shegedi. Sózsiz, mundaı jaǵdaıda memleket tıisti sharany qolǵa alýy kerek. Biraq, tyıym bárin ornyna qoıady deýge taǵy bolmaıdy. Meniń oıymsha, bul salalyq odaqtar men AShM-ge, basqa da naryq qurylymdaryna kelissózder ústeline otyryp, durys sheshim tabýǵa jol ashady», - dedi mınıstr.

Eske sala ketsek, buǵan deıin «Qazaqstannyń et odaǵy» birlestiginiń basshysy Asyljan Mamytbekov tiri maldy eksporttaýǵa qoıylǵan shekteýge qatysty pikir bildirgen bolatyn.