AShM maıly daqyldar egistiginiń alqabyn 2,5 mln. gektarǵa jetkizýdi josparlap otyr
ASTANA. 28 jeltoqsan. QazAqparat /Rýslan Ǵabbasov/ - Maıly daqyldar egistiginiń alqabyn 2,5 mln. gektarǵa jetkizý josparlanyp otyr. Bul týraly búgin bıylǵy 11 aıdyń qorytyndysyna arnalǵan Úkimet otyrysynda Aýyl sharýashylyǵy mınıstri Asyljan Mamytbekov málim etti.
«Maıly daqyldar óndirisiniń kólemin arttyrý úshin taýar óndirýshilerdiń qyzyǵýshylyǵyn arttyrý maqsatynda sýbsıdııalaýdyń joǵary normatıvteri belgilendi. Atalǵan shara salanyń tıimdiligin arttyrýǵa múmkindik berdi», - dedi mınıstr. Onyń sózine qaraǵanda, 3 jyldyń ishinde olardyń egis alqabtary 905 myńnan 1,8 mln. gektarǵa artty. «Aldaǵy ýaqytta da atalǵan daqyldardyń egis alqabyn 2-2,5 mln. gektarǵa jetkizip, keńeıtý sharalary josparlanýda. Búginde memlekettik qoldaýdyń deńgeıi saqtalǵan jaǵdaıda biz maıly daqyldar boıynsha aldaǵy eki jylda ózimizdi qamtamasyz etý dárejesine jetemiz», - dep atap ótti A. Mamytbekov.
