AShM: Qyrǵyzstanda shyqqan túıneme aýrýynan Qazaqstanǵa qaýip joq
Olardyń aıtýynsha, Qazaqstan naryǵyna et jetkizetin qyrǵyzstandyq kásiporyndarmen birlese jumys atqarylady.
«Jalpy alǵanda Qyrǵyzstannan mal tiri kúıinde jetkizilmeıdi. Bizdiń naryqqa mal sharýashylyǵy ónimderin jiberetin qyrǵyzstandyq kásiporyndar bar. Aqparat keshe ǵana paıda boldy, ázirge 11 adamnyń túıneme juqtyrǵanyn bilemiz. Endi qyrǵyzstandyq áriptesterimizben jumys istep, naqty qandaı sharalardy júrgizýdi sheshý kerek. Eń aldymen ettiń qaıdan jetkizilgenin anyqtaý kerek. Ázirge karantın jarııalanǵan joq, tyıym salynǵan joq. Kelip keter qaýip te joq», - dep jaýap berdi jýrnalıster suraǵyna QR AShM Veterınarlyq baqylaý jáne qadaǵalaý komıtetiniń tóraǵasy Arman Óteǵulov.
Eske sala ketsek, Qyrǵyzstannyń Jalalabad oblysynda túıneme juqtyrdy degen joramalmen 11 adam aýrýhanaǵa jatqyzyldy. Qyrǵyzstannyń Densaýlyq saqtaý mınıstrliginiń ókilderi túıneme juqtyrǵandardyń barlyǵy mal soıýǵa qatysqanyn habarlady.