AShM qus tumaýynan shyǵyn kórgen sharýalarǵa qansha teńgeden berýi múmkin
NUR-SULTAN. QazAqparat – Aýyl sharýashylyǵy mınıstrligi Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov qus tumaýynan shyǵyn kórgen sharýa ıelerine tólenetin ótemaqyǵa qatysty aıtty, dep habarlaıdy QazAqparat tilshisi.
«Bir qustyń baǵasy Statıstıka komıtetiniń aqparatyna baılanysty bolady. Bizde tamyz aıynda berilgen málimet bar. Qyrkúıek aıynyń málimeti qazan aıynyń 2 nemese 3-kezeńinde belgili bolady. Jalpy qustyń shyǵynyna baılanysty qansha aqsha tólenetini týraly málimet ár aıdyń 10-15-i berilip turýy kerek. Biraq biz Statıstıka komıtetimen kelisip, erterek anyqtap bereıik dep otyrmyz. Mal ıeleri qusynyń esebi týraly sharýashylyq kitabyn daıyndap, shyǵyn boıynsha aqparatty berý úshin qujattaryn daıyndap otyr», - dedi Tursyn Qabdoldanov OKQ-da ótken baspasóz máslıhatynda.
Komıtet basshysy tamyz aıynda sharýalardyń shyǵyny (qus tumaýynan emes) taýyq boıynsha 800-1200 teńgeden ótelip bergenin habarlady. Qaz ben úırektiń baǵasy odan qymbatyraq tólenedi.
«Málimetterdiń bárin alǵannan keıin komıssııa músheleri ózderi otyryp, qustyń basyna jáne túrine qaraı baǵany aıqyndaıdy», - dedi ol.
Eske sala ketsek, buǵan deıin Tursyn Qabdoldanov memleket qandaı jaǵdaıda qus tumaýynan qyrylǵan qustar boıynsha sharýa ıesiniń shyǵynyn ótep beretinin túsindirip bergen bolatyn.
