AShM qus etiniń ımportyna táýeldilik máselesin túbegeıli sheshpek
«Qazirgi ýaqytta qus etiniń ımportyna táýeldilikti qysqartý – Aýyl sharýashylyǵy mınıstrligindegi eń mańyzdy mindetterdiń biri. Baıqalyp otyrǵandaı, ónim óndirisi artyp keledi. Importqa táýeldilik jyl saıyn tómendeýde. Aýyl sharýashylyǵy mınıstrligi ımportqa táýeldilik máselesin jaqyn ýaqytta túbegeıli sheshýdi josparlap otyr. Sondyqtan et baǵytyndaǵy qus sharýashylyǵy salasyna memlekettik qoldaýdy arttyrýǵa, onyń ishinde jumys istep turǵan qus fabrıkalarynyń qýatyn keńeıtýge jáne jańalaryn salýǵa basa nazar aýdarylady», - dep habarlaıdy mınıstrlikten.
Naqtyraq aıtqanda ımportty almastyrý jónindegi mindetterdi iske asyrý aıasynda jaqyn jyldary respýblıkada jalpy qýaty jylyna 175 myń tonna ónim óndiretin 12 jańa qus fabrıkasy jumysyn bastaıdy. Bıyl 8 qus fabrıkasy paıdalanýǵa beriledi. Birinshi jartyjyldyqta «Shymkent qus» JShS (Túrkistan oblysy) jáne «KazAgros» BJK (Qostanaı oblysy) iske qosylǵan.
Jaqynda QR Aýyl sharýashylyǵy mınıstri Saparhan Omarov iri Makınsk qus fabrıkasy qurylysynyń barysyn ózi baryp tekserip kelgen. Sondaı-aq etti qus sharýashylyǵy erekshe basymdyqqa ıe bolǵanyna qaramastan memleket jumyrtqa óndirisin qoldaýdy jalǵastyrady.
Buǵan deıin habarlanǵandaı, koronavırýs pandemııasyna baılanysty Aýyl sharýashylyǵy mınıstrligi jumyrtqaǵa beriletin taýarlyq-erekshe sýbsıdııalardy saqtap qaldy. Negizi ony qus ósirýshilermen kelisilip qabyldanǵan AÓK damytý memlekettik baǵdarlamasyna sáıkes bıyl 1-shi qańtardan bastap alyp tastaýy kerek edi.
«Jumyrtqa áleýmettik mańyzy bar ónim. Onyń quny kóptegen tamaq ónimderi men óndiristik taýarlardyń ózindik qunyna áser etedi. Sondyqtan, QR Aýyl sharýashylyǵy mınıstrligi jumyrtqa óndirýshilerdi qoldaýdy jáne bir jumyrtqany sýbsıdııalaý normatıvin 3 teńgeden 1,5 teńgege deıin azaıta otyryp, «taǵamdyq jumyrtqa óndirisin sýbsıdııalaý» baǵytyn saqtaýdy usyndy. Qus ósirýshilerdi qoldaýǵa jáne sáıkesinshe jumyrtqanyń ózindik qunyn arzandatýǵa Úkimet 5 mlrd teńgeden astam qarjy bóledi. Sondaı-aq, jumyrtqa óndirýshilerge «Qarapaıym zattar ekonomıkasy» baǵdarlamasy arqyly aınalym kapıtalyn tolyqtyrý úshin qarjylandyrýdyń jeńildetilgen túrin alý múmkindikteri berildi. Degenmen bıyl jumyrtqa ósimi qus eti óndirisiniń ósimimen almastyryldy. Osyǵan baılanysty Qazaqstandaǵy qus fabrıkalarynyń barlyǵy derlik jumyrtqa jáne et baǵyttarymen qatar aınalysatynyn aıta ketý kerek. Bir baǵytta ǵana aınalysatyndar – qus sharýashylyǵynda sırek kezdesetin jaǵdaı», - delingen habarlamada.