AShM quny 2,7 trln teńge ınvestıtsııalyq jobany bastady
Aýyl sharýashylyǵy mınıstrligi jańa ınvestıtsııalyq jobalardy iske asyra bastady. Joba 5 jylǵa arnalǵan. Bul týraly QR Aýyl sharýashylyǵy vıtse-mınıstri Erbol Tasjúrekov málim etti, dep habarlaıdy Kazinform.
«Búgingi konferentsııada TMD mınıstrlikteri deńgeıinde elimizdiń ınvestıtsııalyq ahýaly men erekshelikteri týraly prezentatsııa jasaldy. Al jalpy bıznestik usynystar men jobalardy memleketter ózara B2B kezdesý ótkizý arqyly iske asyrady. Elimizde 800-den astam ınvestıtsııalyq joba qolǵa alyndy. Jobanyń jalpy quny 2,7 trln teńge jáne ol 5 jyl boıy iske asyrylady. TMD elderiniń bıznes ókilderi ınvestıtsııalyq jobalarǵa qatysamyz dese, biz ashyqpyz, barlyq qolaıly jaǵdaıdy jasaýǵa daıynbyz», - dedi Erbol Tasjúrekov Astanada ótken TMD elderinde azyq-túlik qaýipsizdigin qamtamasyz etý salasyndaǵy yntymaqtastyq máseleleri jónindegi mınıstrler konferentsııasynan keıin Kazinform tilshisiniń saýalyna jaýap bere otyryp.
Vıtse-mınıstrdiń aıtýynsha, joǵaryda atalǵan ınvestıtsııalyq jobalardyń ishinde mal sharýashylyǵy, ósimdik salasy men aýyl sharýashylyǵy taýarlaryn óndirý de bar.
Aıta keteıik, búgin Astanada TMD-ǵa qatysýshy memleketterdiń azyq-túlik qaýipsizdigin qamtamasyz etý salasyndaǵy yntymaqtastyq máseleleri jónindegi mınıstrler konferentsııasy ótti.
